DILI, 20 maiu 2019 (TATOLI)– Governu liuhosi Ministru Reforma Lejizlativa no Asuntu Parlamentár (MRLAP), Fidelis Leite Magalhães, afirma, sei halo reforma lejizlativa sira ho selesaun espesífiku tuir preokupasaun Prezidente Repúblika (PR) nian.
“Preokupasaun hosi Prezidente Repúblika nian ne’e hanesan mós preokupasaun governu nian. Ami sei halo esforsu tomak no halo servisu di’ak hodi halo reforma ba lei sira ho selesaun espesífiku,” hateten Fidelis Magalhães, ohin, ba jornalista sira hafoin partisipa iha selebrasaun loron restaurasaun independénsia ba dala-XVII (20 maiu 2002-20 maiu 2019) iha Palásiu Prezidensiál, Bairru Pite, Dili.
Nia salienta, reforma lejizlativa ne’ebé PR temi ne’e preokupa liu ba asuntu espesífiku, maibé governu sei haree no MRLAP sente no toma nota, espera katak depois 20 maiu, sei iha ritmu ne’ebé forte liután atu bele konkretiza mehi sira.
Iha diskursu Prezidente Repúblika nian husu ba governu atu konsentra ba reforma sira iha área tolu maka ambiente jerál negósiu nian hodi fasilita investimentu no atividade komersiál, merkadu traballu no tributasaun ka impostu.
PR esplika katak objetivu hosi reforma área tolu ne’e maka atu bele hadi’a no impulsiona ekonomia nia kompetitividade no dudu potensiál kreximentu no kapasidade resposta ekonomia nian bainhira hasoru problema. Tanba Timor-Leste seidauk iha potensiál kreximentu no sei depende de’it a osan mina-rai.
Nune’e maka dezenvolvimentu presiza iha kuadru legál ida ne’ebé favoravel ba realizasaun negósiu no seguransa iha tranzasaun komersiál, interna no esterna.
Ba kestaun hirak ne’e maka governu ida ne’e tenke halo reforma lejizlativa, judisiáriu no institusionál ida ho substansiál no kle’an.
Jornalista : Zezito Silva
Editór : Francisco Simões
