iklan

NASIONÁL

Governu Atualiza Kontratu Manutensaun Estrada Natarbora-Laklubar No Manatutu-Baucau

Governu Atualiza Kontratu Manutensaun Estrada Natarbora-Laklubar No Manatutu-Baucau

Primeiru-Ministru, Taur Matan Ruak, prezide reuniaun Konsellu Ministru iha Palásiu Governu. Imajen/Egas Cristovão

DILI, 15 maiu 2019 (TATOLI) – Governu liuhosi desizaun Konsellu-Ministru (KM) iha kuarta ne’e, analiza no aprova deliberasaun rua husi Ministru Obras Públika, Salvador Soares dos Reis Pires, kona-ba kontratu públiku empreitada atu hasa’e kualidade no manutensaun estrada Natarbora-Laklubar no Manatutu-Baucau.

Ministru Estadu Prezidénsia Konsellu-Ministru, Hermenegildo Augusto Cabral Pereira hateten ezekutivu sira delibera proposta ne’e hodi alterasaun kontratu manutensaun estrada.

Ministru Estadu Prezidénsia Konsellu Ministru, Hermenegildo Augusto Cabral Pereira. Imajen/Egas Cristovão

“Konsellu-Ministru delibera alterasaun kontratu China Nuclear Industry 22 Construction, hodi halo manutensaun estrada ne’ebé presiza halo alterasaun kontratu, proposta ne’e mai husi Ministru Obras Públika (MOP) ba estrada Natarbora-Laklubar. Konsellu-Ministru rona proposta ne’e no hatán hodi halo alterasaun,” hateten Ministru Hermenegildo Pereira ba jornalista sira iha Palásiu Governu.

Governante ne’e akresenta, deliberasaun ida tan husi MOP kona-ba alterasaun kontratu empreitada husi konsórsiu Shanghai Construction Group Co Ltd no PT. Brantas Abipraya ba estrada Manatutu-Baucau, ne’ebé nia obra sei la’o hela. “Ita atrazu tanba fatór ne’ebé kompañia rasik la kontrola, ne’ebé halo alterasaun no ajustamentu”.

Deliberasaun rua ne’e sei fó dalan atu extende durasaun ba kontratu, la ho kustu adisionál no laiha mudansa ba kontratu, ho forma atu kompensa atrazu no interrupsaun husi serbisu ba obra ne’ebé mak kauza husi udan boot iha área manutensaun estrada.

Antes ne’e, KM mós aprova ona proposta deliberasaun kona-ba alterasaun husi kontratu prestasaun servisu konsultoria iha supervizaun ba manutensaun no hadi’a estrada nasionál sira.

Deliberasaun ida ne’e ko’alia kona-ba servisu konsultóriu ba estudu detalladu enjeñaria no supervizaun obra nian iha trosu estrada sira Manatutu-Natarbora, Manatutu-Laclubar-Natarbora, Tasitolu-Tibar, Tibar-Liquiçá, Tibar-Gleno, Maubara-Carimbala, Baucau-Lautem no Atabae-Mota ain.

Revizaun kontratuál sira ne’e aprova objetivu atu ajusta servisu supervizaun obra nian ba estensaun prazu nian, ne’ebé uluk hetan ona aprovasaun, hodi finaliza obra manutensaun sira no hadi’a trosu estrada sira ne’e nian.

Proposta ne’e hetan ona aprovasaun hosi Konsellu-Ministru iha loron 10 abríl 2019, maibé tenke hetan mós paresér ne’ebé favoravel husi Ministériu Finansa no hetan vistu préviu hosi Kámara Kontas.

Entretantu trosu hosi Manatuto-Baucau hahú konstrusaun iha loron 18 agostu 2016 no tuir planu sei remata iha loron 14 maiu 2019, maibé tanba kestaun administrasaun, obra ne’e atraza uitoan no to’o agora sei iha prosesu manutensaun.

Trosu hosi Manatuto-Baucau ho naruk kilómetru 57,702 no empreza ne’ebé kaer obra ne’e maka Shanghai Construction Group Co., Ltd. husi Xina ho kustu totál ba obra $59.287.453,55.

Jornalista       : Julia Chatarina

Editór             : Rafy Belo

iklan
iklan

Leave a Reply

iklan
error: Content is protected !!