Embaixadór Olanda Vizita MNEK Ko’alia Asuntu Bilaterál

0
46
Sorumutu entre Ministru Negósiu Estranjeiru no Kooperasaun (MNEK), Dionísio Babo Soares ho Embaixadór Olanda Rob Swartbol. FOTO TATOLI: Nelia do Rosário

DILI, 10 maiu 2019 (TATOLI)Ministru Negósiu Estranjeiru no Kooperasaun (MNEK), Dionísio Babo Soares hetan vizita kortezia husi Embaixadór Olanda Rob Swartbol hodi haree progresu liuliu ko’alia asuntu bilaterál no foka mós ba rejiaun inklui mundu.

“Ita foka prioridade ba ita-nia rejiaun iha mundu ne’e. Primeiru maka ita hakarak tama iha ASEAN (Organizasaun Sudeste Aziátiku), tinan oin maka ita haree fila-fali ita tama ka lae,” informa Ministru Dionísio Babo Soares, iha edifísiu MNEK, Praia dos Coqueiros-Díli, sesta (10/05).

“Segundu maka foka ba CPLP (Komunidade ho Lian Portugés-sigla portugés) no terseiru maka maluk sira ne’ebé mai husi Europa, Amérika.  Europa maioria sira-nia relasaun ho ita ne’e iha kooperasaun iha área transversál sira hanesan jéneru, nutrisaun, direitus umanu, hamenus ki’ak, mortalidade Infantil, inan isin rua sira no questões iha área justisa nian,” reforsa tan governante ne’e.

Alende ne’e, tuir ministru katak: “Sira mós ajuda ita liu husi fundu multilaterál, ne’e maka fundus sira mai husi organizasaun internasionál sira, tanba ne’e liu husi vizita ne’e atu haree progresu sira ne’e to’o iha ne’ebé”.

Iha biban hanesan, Ministru Dionísio Babo Soares ho diplomata olandés diskute kona-ba kooperasaun bilaterál maibé mós área seluk tan hanesan HEINEKEN, ne’ebé Olanda hanesan na’in. Prinsipalmente mós apoiu hanesan asisténsia morál no fasilidade ba Timor-Leste durante reuniaun Konsiliasaun Obrigatória Olanda kona-ba mekanizmu lei tasi ne’ebé hanaran UNCLOS (United Nations Convention on the Law of the Sea), partisipa husi Negosiadór Prinsipál Kay Rala Xanana Gusmão.

Iha enkontru ne’e, diplomata timoroan ne’e husu mós ba embaixadór Rob Swartbol atu apoiu no iha mós kooperasaun ba iha peska liuliu indústria no hadi’a ró nian tanba Olanda serbisu hamutuk ho Pt. Pal Surabaya, Indonézia, ne’ebé mak hetan kontratu husi Timor-Leste hodi hadi’a ró Nakroma Berlin.

Tanba ne’e, Ministru Dionísio Babo Soares husu atu iha kooperasaun ne’e foka ba indústria ida hadi’a ró atu nune’e, se iha posibilidade hadi’a de’it iha rai laran atu nune’e bele fó mós servisu ba timoroan sira.

“Nune’e esperansa husi Timor-Leste nian iha futuru atu fortalese liután ita-nia kooperasaun liuliu iha área sira ne’ebé maka hanesan peska, surveillance (fiskalizasaun) tasi nian ne’ebé maka tenke serbisu ho Ministériu Defeza tanba Olanda iha mekanizmu atu kontrola tasi, tanba kontrolu marítima importante tebes,” dehan governante ne’e.

Iha vizita kortezia ne’e, diplomata na’in rua haree hamutuk saida mak bele halo atu bele dezenvolve futuru Timór nian. Relasaun entre Timor-Leste ho Olanda la’o di’ak liuhusi serbisu sira maka hanesan koopera hamutuk ona.

Embaixadór Olanda naun-rezidente no hela iha Jakarta maibé sira-nia área kobre mós Timor-Leste.

Jornalista       : Nelia do Rosário

Editór             : Rafy Belo

HUSIK IDA HATÁN