Embaixadór Alberto Carlos Husu Timoroan iha Indonézia Kuidadu-án

0
1440
Embaixadór Timor-Leste ba Indonézia, Alberto X.P Carlos. Imajen/Francisco Simões

DILI, 22 maiu 2019 (TATOLI)—Embaixadór Timor-Leste ba Indonézia,  Alberto X. P. Carlos, husu ba timoroan hotu ne’ebé hela namkari iha territóriu Indonézia, liliu iha Jakarta, atu  hakmatek no kuidadu-án.

Liuhosi komunikasaun via eletrónika ho Ajénsia TATOLI, ohin, Embaixadór Alberto X. P. Carlos, informa katak parte Embaixada República Democrática de Timor Leste (RDTL) iha Jakarta, dezde tersa (21/5/2019), hasai ona karta xamada atensaun ba timoroan sira hotu (estudante, diplomata, moras sira iha ospitál no sira seluk ne’ebé tama mai vizita) ne’ebé namkari iha rai Indonézia atu la’o ho kuidadu no se bele hakmatek iha ida-idak nia fatin.

Haree ba situasaun polítika iha rai Indonézia, liliu iha Jakarta, Ministru Negósiu Estranjeiru no Kooperasaun RDTL nian, Dionísio Babo, mós hakarak hato’o ba sidadaun Timor-Leste hotu ne’ebé agora iha Indonézia, atu la’o ho kuidadu, se bele hakmatek iha ida-idak nia fatin, lalika demonstra aktu ne’ebé prejudika Timor-Leste nia interese.

Ministru Dionísio Babo preokupa uitoan ho sidadaun Timor-Leste sira ne’ebé agora iha rai Indonézia no husu favór hato’o informasaun ba Embaixada Timor-Leste iha Jakarta bainhira sidadaun sira hasoru buat ruma ne’ebé tau iha risku (inseguransa).

Ba estudante, diplomata, moras sira iha ospitál no sira seluk ne’ebé tama ba vizita Indonézia, liliu Jakarta, Embaixadór Alberto X.P. Carlos, husu favór evita área ne’ebé tuir mai iha Jakarta, hanesan monumentu nasionál (MONAS-sigla Indonézia,    Thamrin,  Tanah Abang, Petamburan ho Slipi).

“Tuir mai Embaixada hato’o  nia enderesu: Embassy of the Democratic Republic of Timor-Leste, Sultan Hotel and Residence, Tower 2, Jl. Jend. Sudirman,

Kota Jakarta Pusat, Daerah Khusus Ibukota Jakarta 10270, Indonézia

DKI Jakarta, 10270, Tel: (+62)21-5706462, 5706463, Fax. (+62)21-570464, http://www.timor-leste.gov.tl.  Hako’ak boot ba imi hotu. Obrigadu,” hatete Embaixadór Alberto X.P. Carlos.

Komisaun Nasionál ba Eleisaun (KPU-sigla Indonézia), tersa horiseik,  fó sai ona rezultadu ofisiál eleisaun ba Prezidénsia Repúblika Indonézia nian, ne’ebé hatudu pakote kandidatu prezidente no vise prezidente ho númeru 01, Joko Widodo-Ma’ruf Amin hetan votu 85.607.362 (porsentu 55,50). Entretantu, pakote kandidatu prezidente ho vise prezidente ho númeru 02, Prabowo Subianto ho Sandiaga Uno, hetan votu 68.650.239 (porsentu 44,50).

Ho rezultadu ne’e halo grupu no elementu sosiedade balun lansa protesta hodi halo manifestasaun iha Repartisaun Sekretariadu Tékniku Administrasaun Eleitorál (Badan Pengawas Pemilu/Bawaslu) hahú kedas iha tersa (21/5/2019) to’o ohin loron, tanba sira deskonfia  iha manipulasaun ba kontájen votu hosi KPU.

Manifestasaun ne’e prejudika totál movimentu no liberdade ema nian iha Jakarta laran, inklui halo perturbasaun ba órden públiku hodi rezulta sasán no karreta lubuk ida mak hetan sunu no estragu.

Jornalista: Francisco Simões

Editór: Xisto Freitas

HUSIK IDA HATÁN