Bombeiru Sei Enfrenta Limitasaun Maske Kompleta Ona Tinan 19

0
27
Pesoál bombeiru hatudu simulasaun iha aniversáriu ba dala 19 iha Kaikoli, ohin. Imajen António Gonçalves

DILI, 24 maiu 2019 (TATOLI) – Bombeiru Timor-Leste kontinua hasoru limitasaun maske ohin kompleta ona tinan 19 ba ninia ezisténsia.

Sekretáriu Estadu ba Protesaun Sivíl,
Alexandrino de Araújo. Imajen António Gonçalves

“Hanesan diresaun operasionál, buat barak maka atu fó atendimentu ba ita nia povu ho lalais. Maibé bombeiru ho limitasaun durante ne’e, kontinua hatudu vontade hodi responde ba povu”, hatete Sekretáriu Estadu Protesaun Sivíl, Alexandrino de Araújo, iha serimónia selebrasaun tinan ne’ebé hala’o iha Kaikoli, ohin.

Momentu espesiál ne’e, nia hato’o parabéns hodi husu atu membru sira kontinua serbí Nasaun di’ak liután.

“Bombeiru Timór-Leste hahú hosi komandante to’o munisípiu, ha’u hato’o ha’u nia parabéns ba imi hotu. Ho loron importante ne’e atu ita hateke fali ba kotuk saida maka halo ona atu refleta didi’ak, nune’e iha loron aban saida maka ita sei halo”, afirma.

Governante ne’e akresenta, todan tebes ba Sekretaria Estadu Protesaun Sivíl tanba instituisaun refere la’ós Instituisaun Boa Governasaun, más instituisaun operasionál.

Biban ne’e, Alexandrino mós hato’o ninia agradesimentu ba família bombeiru hotu, tanba pesoál bombeiru sira dala-barak liu dedika aan tomak ba serbisu kompara ho família.

Komandante Nasionál Bombeiru TL, Claúdio da Silva. Imajen António Gonçalves

Iha fatin hanesan, Komandante Nasionál Bombeiru TL, Claúdio da Silva, hateten bombeiru presiza hetan atensaun, hodi kompleta nesesidade ne’ebé durante ne’e sei falta.

“Durante eziste, Governu halo ona esforsu hodi kria kondisaun lubuk ida, nune’e iha kapasidade no rekursu ne’ebé natoon hodi fó atendimentu másimu ba povu no Nasaun”, katak.

Tema selebrasaun “Espíritu Patriotizmu, Hametin Unidade no Disiplina”, hanesan motivasaun hodi hasoru risku.

“Bombeiru nia servisu hasoru risku, tan ne’e bombeiru hala’o nia kna’ar loron ba loron tenke iha espíritu patriotizmu, unidade iha ekipa, disiplina iha servisu no vontade no laran mós ba malu, nune’e hala’o misaun ho susesu”, akresenta tan.

Eventu ne’e ekipa sira hatudu simulasaun bainhira kombate inséndiu.

Serimónia ne’e hetan partisipasaun hosi Vise Xefe Estadu Maiór F-FDTL, Brigadeiru Jenerál Falur Rate Laek, reprezentante Embaixada Portugal iha Timór-Leste, parseiru dezenvolvimentu, no família bombeiru TL.

Jornalista: Antónia Gusmão

Editora: Rita Almeida

HUSIK IDA HATÁN