Prezidente Repúblika, Francisco Guterres Lú Olo, komunika hela ho Prezidente Repúblika Indonézia, Joko Widodo, via telefónika hosi Palásiu Prezidensiál, Bairru Pite, Dili, Kinta (30/5/2019). Imajen/Media PR

DILI, 31 maiu 2019 (TATOLI)-Prezidente Repúblika, Francisco Guterres Lu Olo, liuhosi xamada telefónika, Kinta (30/5/2019), kongratula nia omólogu Prezidente Repúblika Indonézia, Joko Widodo (Jokowi) ne’ebé re-eleitu nu’udar xefe estadu Repúblika Indonézia (RI) nian ba periodu 2019-2024.

“Ha’u hakarak fó parabens ba re-eleisaun Prezidente Repúblika Indonézia. Povu indonézia hili nia xefe estadu ida. Povu Indonézia hili ninian bem estar no dezenvolvimentu liuhosi ita-nia figura. Ha’u hato’o votu susesu ba mandatu ba oin. Ha’u reafirma fila fali Timor-Leste nia kompromisu  atu hametin di’ak liután relasaun rai rua no povu ba futuru,” hateten Prezidente Repúblika, Francisco Guterres Lú Olo  bainhira komunika ho Prezidente RI, Joko Widodo.

Jokowi agradese ba kongratulasaun nee no nia promete katak durante ninia mandatu tinan lima ba oin tan sei kontinua reforsa kooperasaun ida forte no util ba nasaun rua.

Durante konversa, Lú Olo konvida ninia omólogu nee atu bele partisipa komemorasaun tinan 20 konsulta popular (referendum) Timor-Leste ba dala-XX  ne’ebé sei selebra iha loron 30 Agostu 2019

Aproveita okaziaun ne’e, Prezidente Repúblika Francisco Guterres Lú Olo ho espoza Cidália Lopes Nobre Mouzinho Guterres hato’o felisitasaun ba  Prezidente Jokowi no espoza Iriana Joko Widodo no povu Indonézia ne’ebé sei selebra Idul Fitri.

Komisaun Nasionál ba Eleisaun (KPU-sigla indonézia) fó sai ona rezultadu ofisiál eleisaun Prezidente Repúblika Indonézia nian katak, kandidatu ho númeru 1, Jokowi-Ma’ruf Amin, eleitu nu’udar Prezidente Repúblika ho persentajen 55 % no kandidatu ho númeru 2, Prabowo Subianto- Sandiago Uno ho persentajen 45%.

Lú Olo mós re-lembra hetan felisitasaun hosi Jokowi hafoin rezultadu eleisaun prezidente repúblika Timor-Leste nian ne’ebé eleitu nia nu’udar Prezidente Repúblika ba povu Timor-Leste periodu 2017-2022.

Jornalista         : Agapito dos Santos

Editór               : Francisco Simões

HAKEREK NO HATÁN

Please enter your comment!
Please enter your name here