Ministru Transporte no Komunikasaun, José Agustinho da Silva. Imajen Mídia MTK

DILI, 31 maiu 2019 (TATOLI)—Ministru Transporte no Komunikasaun, José Agustinho, hateten kooperasaun bilaterál entre Timor-Leste (TL) ho Alemaña kontinua metin.

“Lori VIII Governu Konstitusionál Timor-Leste nia naran, hato’o ita-nia apresiasaun profundu no gratidaun boot ba povu no Governu Federál Repúblika Alemaña ba apoiu hotu no kooperasaun entre nasaun rua (TL no Alemaña) kontinua metin liu-tan,” Ministru José Agustinho fó felisitasaun ne’e hafoin asiona kontratu dokumentu ba Ró Nakroma 2, iha Ministériu Finansa, Aitarak Laran, ohin.

Nia dehan, durante ne’e governu Alemaña fó asisténsia téknika no finanseira hodi habelar kooperasaun ne’eb´metin liu.

“Ita hein kooperasaun bilaterál ne’e bele extende tan iha futuru,” Ministru Transporte ne’e esklarese.

Governante ne’e haktuir kooperasaun bilaterál entre Timor-Leste ho Alemaña hahú iha tinan 2003 liuhosi líder rezisténsia Ramos Horta ne’ebé altura ne’ebá hanesan Ministru Negósiu Estranjeiru no Kooperasaun iha Primeiru Governu Konstitusionál.

Nia informa, governu Alemaña durante ne’e iha kooperasaun kona-ba ró Berlin Nakroma 1 no oras ne’e Nakroma 2 sei mai tan, maibé ró Nakroma 2 sei halo operasaun iha Timor-Leste iha tinan 2021.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here