Prezidente Komisaun A Parlamentu Nasionál, Carmelita Caetano Moniz. Imajen/espesiál

DILI, 31 maiu 2019 (TATOLI)Kazál timoroan ne’ebé komete krime tráfiku droga ne’ebé Servisu Alfándega Atambua, Timor Osidentál nian prende, foin lalais ne’e, sei prosesa tuir lei Indonézia nian.

 “Agora ita lori droga hosi Timor-Leste sai ba Indonézia no autoridade Indonézia nian kaer sira   iha sira nia rai, entaun tenke prosesa ho sira nia lei Indonézia nian,” esplika Prezidente Komisaun A Parlamentu Nasionál (PN) ne’ebé trata asuntu Konstitusionál no Justisa, Carmelita Caetano Moniz, ba Ajénsia Tatoli, ohin, iha Parlamentu Nasionál.

Deputada Carmelita Moniz  fó ezemplu; se ema ida lori droga tama mai Timor-Leste, maka autoridade Timor-Leste kaer iha territóriu Timor-Leste nian, automátika tenke julga iha Timor-Leste tuir Lei ne’ebé mak vigora iha Timor-Leste.

Nia afirma, nasaun Indonézia ne’ebé kaer kriminozu hanesan kazál timor oan, foin lalais ne’e, ne’ebé hatama droga ba sira nia rai, Indonézia tenke implementa lei sira nian hodi julga suspeitu sira iha ne’ebá.

Akordu estradisaun, tuir Jurista Carmelita Moniz katak, ezemplu; ema ida halo krime iha Timor-Leste, nia halai ba rai li’ur, atu bolu ema ne’e mai fali, ida ne’e maka tenke iha akordu estradisaun entre nasaun rua.

“La’ós ita nia ema halo ona krime iha rai li’ur, agora ita bolu fali nia mai julga iha ne’e, ida ne’e difisil,” esplika Deputada Carmelita Moniz.

“Sira halo prosesu kriminál iha Indonézia, derrepente sira halai mai Timor-Leste. Instituisaun kompetente sira iha Indonézia, sira husu mai Timor-Leste atu lori fila ema ne’e ba julga iha ne’ebá, se la fó tenke liuhosi akordu judisiáriu, liuhosi ne’e entaun sira bele julga nafatin iha ne’e”.

Tuir Carmelita Moniz katak, kazu hirak ne’e konsidera krime trans nasionál, kaer iha ne’ebá tenke julga ho lei iha ne’ebá nian. Lei ne’ebá forte tebes ba droga nian, iha prizaun perpétua no pena morte.

Nia husu ba timoroan sira labele mete ba krime tráfiku umana, krime trans nasionál, tráfiku droga, korrupsaun. Hothotu tenke iha konsiénsia katak rai ki’ikoan ne’e  labele estraga ho hahalok at.

Alfándega Atambua Kaptura Timoroan Fen-La’en Lori Droga

Jornalista      : Zezito Silva

Editór             : Francisco Simões

HAKEREK NO HATÁN

Please enter your comment!
Please enter your name here