Sekretáriu Estadu Juventude no Desportu, Nélio Isaac Sarmento. Imajen Tatoli/ Egas Cristóvão

DILI, 31 maiu 2019 (TATOLI) – Nu’udar Nasaun foun, Timor-Leste presiza joven produtivu atu involve iha prosesu dezenvolvimentu nasionál, tanba ne’e foin sa’e sira presiza kuidadu saúde hodi hadook án hosi tabaku.

“Nasaun ne’e presiza ema produtivu, tanba ne’e maka joven sira atu kuidadu saúde hodi prenxe ukun án. Komemora loron mundiál tabaku ne’e importante tebes hodi fó hanoin ba joven sira katak tenke kuidadu saúde”, afirma Sekretáriu Estadu Juventude no Desportu, Nélio Isaac Sarmento, iha ámbitu komemorasaun loron mundiál tabaku ne’ebé hala’o iha sekretaria juventude no desportu, ohin.

Governante ne’e husu ba joven sira atu para fuma sigarru no kuidadu saúde hodi dezenvolve Nasaun liu hosi prestasaun ne’ebé iha, liuliu iha área desportu.

Tuir Nélio joven barak iha talentu ba desportu, maibé kondisaun saúde la permite tanba fuma no hemu tua.

Nune’e mós Diretór Gabinete Polítika no Kooperasaun Ministériu Saúde, Narcisio Fernandes, hateten selebrasaun ne’e hatán ba dekretu lei númeru 14/2016 kona-ba tabaku.

“Objetivu marsa ne’e hodi komemora loron mundiál tabaku, tema ba tinan ne’e maka ‘la fuma tabaku’ tanba ne’e maka bazeia ba dekretu lei númeru 14/2016 kona-ba tabaku, dekretu ne’e kontrola ema sira ne’ebé mak fuma tabaku atu labele fuma iha fatin ne’ebé define ona iha dekretu lei”, hatutan nia.

Narcisio Fernandes afirma tuir peskiza fatór risku ba moras la hada’et iha Timór-Leste ne’ebé hala’o tinan 2014 hatudu populasaun adultu hahú hosi idade 18 ba leten fuma tabaku ho porsentu 70.

“Porsentu ne’e hatudu mai ita, Timór-Leste nu’udar nasaun ida ne’ebé aas liu iha Rejiaun Aziátika inklui mós iha mundu”.

Ema ne’ebé dependénsia ba tabaku (tabagismu), nia dehan kauza primeiru mak mate, ne’ebé ita bele prevene no atualmente hamosu ona preokupasaun ba saúde públika, tantu iha Timór-Leste no mundu.

Impaktu la’ós diretamente ba saúde publíka maibé mós ba impaktu negativu ba meiu ambiente no ekonomia nasaun nian, iha ne’ebé tantu ema fuma no ema ne’ebé la fuma hotu-hotu tenke selu nia konsekuénsia.

Tanba ne’e, Governu Timór-Leste liu hosi Ministériu Saúde halo ona esforsu atu redús númeru fumadór iha sosiedade, nune’e bele redús impaktu negativu ba saúde.

“Esforsu Governu nian liuhosi kria dekretu lei rejime kontrola tabaku númeru 14/2016, hanesan meiu ida atu bele alkansa objetivu redusaun númeru fumadór iha Timór-Leste”, dehan nia.

Estudante, Zélia Correia da Costa, hateten fuma ladi’ak ba saúde. “Ha’u nia haree fuma ladi’ak ba ita nia saúde, tanba ne’e husu ba maluk timoroan hotu atu hapara fuma”, katak.

Alende marsa ne’ebé kompostu hosi estudante, joven sira, funsionáriu públiku hosi SEJD no MS, inklui parseiru sira. Pesoál saúde sira mós halo tratamentu saúde matan no koko tensaun ba partisipante sira.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here