Komisáriu Komisaun Funsaun Públika Asuntu Disiplinár, António Freitas

DILI, 31 maiu 2019 (TATOLI)Dekretu lei nú. 27/2016 ne’ebé regula kona-ba rejime jurídiku apoiu gabinete esplika katak ministru ka sekretáriu estadu lori ninia asesór no xefe gabinete nu’udar apoia polítika ba serbisu iha Estadu, tenki hatene aan atu labele halo intervensaun hodi manda fali kargu xefia, kargu diretór no funsionáriu públiku sira.

Tuir Komisáriu Funsaun Públika Asuntu Direitu Umanu, António Freitas dehan, problema intervensaun polítika agora akontese maka’as iha administrasaun estadu VIII Governu Konstitusionál.

António haktuir, iha liña ministeriál no sekretáriu estadu sira no asesór polítika dalaruma la kompriende no la hatene kontiúdu hosi dekretu lei nú. 27/2016 hodi halo sira interven maka’as ba serbisu tanba la kompriende kona-ba regra serbisu administrasaun funsaun públika nian.

Nia hatutan, dalaruma problema sira ne’e halo ministru no funsiónariu públiku to’o kargu xefia sira haree malu oin to’os ba malu afeta ba serbisu estadu labele hetan governasaun di’ak.

 “Kazu balun asesór apoiu gabinete ministru halo fali orientasaun ba kargu funsionál sira. Balun dehan ami-nia partidu manán ami tenki orienta imi diretór sira ne’e loloos labele,” dehan Komisáriu António iha nia diskursu bainhira halo enkontru desiminasaun ba dekretu lei kona-ba rejime jurídiku gabinente ministeriál no rejime karreira profisionál seniór administrasaun públika iha kontestu funsaun públika ne’ebé hala’o iha edifísiu Ministériu Defeza, Fatuhada, Dili, ohin.

António esklarese, dekretu lei nú. 27/2016 kona-ba rejime jurídiku apoiu gabinete sira ninia kompeténsia tomak konsentra iha Ministériu Prezidénsia Konselllu Ministru (MPKM. Nune’e, regula ministru ka sekretáriu estadu ida lori ninia apoiante polítika ba ajuda gabinete hamutuk ema na’in 11.

Iha relatóriu inspesaun ne’ebé KFP halo ba liña ministeriál balun identifika dalaruma ministru ida halo serbisu arbiru, tanba la kompriende didi’ak lei funsaun públika nian. Ho problema hirak ne’e, KFP aprezenta ona ba Primeiru-Ministru, Taur Matan Ruak atu aviza ba ministru no sekretáriu estadu atu hatene aan halo serbisu ho profisionál hodi labele hasai desizaun polítika arbiru ne’ebé afeta ba serbisu administrasaun nian.

“Ha’u dehan ba señor primeiru-ministru, ha’u kaer asuntu disiplinár iha KFP nian, ita-boot nia membru governu sira hakarak manda de’it, maibé la kompriende dekretu lei no nia (ministru) la kompriende ninia funsaun hodi halo serbisu arbiru,” dehan komisáriu KFP ne’e.

Komisáriu KFP mós esplika lala’ok implementasaun hosi dekretu lei númeru 22 ne’ebé regula kona-ba serbisu profisionál seniór. Dekretu ne’e importante tanba atu rezolve funsionáriu no kargu xefia sira ne’ebé ba tiha eskola fila mai la hetan fatin serbisu.

Iha fatin hanesan, Diretór Jerál Administrasaun Ministériu Defeza, Nuno de Carvalho dehan liu hosi sosializasaun ne’e funsionáriu Ministériu Defeza tomak bele koopera ka serbisu hamutuk ho ministru ida oinsá lori serbisu atu hetan governasaun di’ak liuhosi hadi’a serbisu administrasaun públika.

Nia dehan, desiminasaun ba dekretu lei kona-ba rejime jurídiku gabinente ministeriál no rejime karreira profisionál seniór administrasaun públika iha kontestu funsaun públika no informasaun kona-ba kompeténsia serbisu no métodu hosi Fundu Dezenvolvimentu Kapitál Umanu (FDCH-sigla portugés) importante tebes ba Ministériu Defeza hodi hatene.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here