Ministru Prezidénsia Konsellu Ministru, Agio Pereira

DILI, 31 maiu 2019 (TATOLI)—Governu Timor-Leste (TL) kontinua hein Austrália forma governu foun hafoin Parlamentu rai-rua halo ratifikasaun ba akordu fronteira marítima (FM).

“Ratifikasaun ne’e tenke halo duni, maibé hein lai. Austrália nia governasaun foun seidauk hahú, ne’ebé ita hein governu foun mai,” Ministru Prezidénsia Konsellu Ministru, Agio Pereira ba Agência TATOLI iha Ministériu Finansa, sesta ne’e.

Akordu foun ba fronteira marítima ne’e asina iha sede Organizasaun Nasaun Unida (ONU) nian iha Nova Iorke, iha loron 6 marsu 2018, iha ne’ebé Sekretáriu Jerál ONU, António Guterres no Prezidente Komisaun Konsiliasaun Obrigatóriu, Peter Taksoe Jensen, mak sai hanesan sasin.

Akordu ne’e asina hosi reprezentante Governu Timor-Leste, Ministru Estadu Prezidénsia Konsellu Ministru, Hermenegildo Pereira no parte Austrália nian, Ministra Negósiu Estranjeiru, Julie Bishop.

Oras ne’e, povu Timor-Leste hein hela ratifikasaun hodi hakarak ba prosesu dezenvolvimentu greater snrise, maibé akordu ne’e tenke ratifika hosi Parlamentu Nasionál.

Prosesu sira ne’e hotu la’o tanba esforsu maka’as hosi Xefe Negosiadór Prinsipál ba Asuntu Fronteira Marítima, Kay Rala Xanana Gusmão ho nia ekipa.

Governu Timor-Leste foti Kay Rala Xanana Gusmão sai hanesan Reprezentante Espesiál Governu nian liuhosi rezolusaun Konsellu Ministru, hodi fó kompeténsia ba negosiasaun tomak ba fronteira tasi no fronteira rai maran.

 

Jornalista: Evaristo Soares Martins

Editór: Xisto Freitas 

HAKEREK NO HATÁN

Please enter your comment!
Please enter your name here