Komandante Sentru Formasaun Polísia (SFP), Superintendente Arqiminho Ramos

DILI, 30 maiu 2019 (TATOLI)—Komandante Sentru Formasaun Polísia (SFP), Superintendente Arquimino B. L. Ramos dehan membru polísia hotu-hotu ne’ebé pasa iha  SFP hetan ona modelu formasaun oioin ne’ebé hariku sira nia koñesimentu atu serbisu tuir doutriña disiplina nune’e evita hahalok brutalizmu iha terrenu hodi viola fali ema seluk nia direitu.

Nia esplika durante tuir formasaun polísia sira sei aprende kna’ar serbisu PNTL nian tuir Konstituisaun artigu 147 katak polísia tenke defende legalidade demokrátika no garante seguransa interna ba sidadaun hotu no la inklina ba grupu ka organizasaun ruma.

Nune’e mós, nia hatutan, polísia ida hala’o kna’ar prevensaun krimi tenke bazeia ba respeitu direitu umanu no lei maka determina regra no regulamentu ba polísia. Tanba kna’ar no responsabilidade pesoál polísia atu fasilita ema hirak ne’ebé viola regra no lei.

 “Teoria ne’e ita hanorin sira ho disiplina, la’ós ba aplika buat seluk (“brutalizmu”). Ne’e la loos!,” dehan Arquimino ba Agência Tatoli iha nia kna’ar fatin, SFP, Comoro, Dili ohin, relasiona ba públiku ne’ebé kestiona oknum PNTL balun seidauk hatudu profisionalizmu loloos bainhira halo atuasaun, liliu kontinua lori kilat tiru arbiru no hatudu atitudi brutalizmu ka baku ema arbiru.

Nia innforma, SFP nu’udar Akadémika Polísia ne’ebé ninia kurríkulu hanorin padraun hanesan mós eskola polísia Portugál, Austrália, Nova Zelándia no nasaun seluk nian, katak bainhira ema sivíl ida rekrutadu ba polísia sei tuir formasaun báziku hanesan kursu formasaun karáter, atualizasaun siénsia polisiál no kursu espesialidade.

“Ita iha formasaun ne’ebé padraun hanesan Austrália, Portugál, Nova Zelándia no ita iha kurríkulu PNTL ne’ebé hetan akreditasaun hosi Ministériu Edukasaun liuhusi Ajénsia Nasionál ba Avaliasaun no Akreditasaun Akadémiku (ANAAA) no INDIMU-SEPFOPE tanba nasaun hosi rai li’ur mak mai hadi’a ita-nia kurríkulu ne’e ho fasilidade hodi fó formasaun ida ho di’ak,” tenik nia.

Arquimino informa ba membru polísia hahú husi ajente to’o superintendente hotu-hotu tenke hakruuk ba regulamentu no norma étika sira ne’ebé defini iha instituisaun PNTL.

Implementasaun regulamentu, tuir komandante ne’e katak bazeia mós ba lei sira ne’ebé vigora iha regulamentu disiplinár PNTL hanesan dekretu lei nú. 13/2004, loron 16 juñu.  Kritériu disiplina mak membru hotu tenke hatene no halo tuir saida mak estipula iha regulamentu disiplinár PNTL tuir artigu 8 kona-ba devér jerál no devér espesífiku ne’ebé artikuladu iha regulamentu ne’e rasik hanesan devér korresaun, devér zelo, devér izensaun, devér obediénsia, devér lealdade, devér sigla, devér  asidulidade, devér pontualidade no devér aprumo.

Eis Komandante Polísia Eskuadra Maubisse ne’e hatutan, tanba kestaun disiplinár sai problema boot, ne’e duni Komandu PNTL desidi fó formasaun uluk ba membru polísia hamutuk ema na’in 40 iha SFP.

Membru na’in 40 sei sai treinadór depois obrigatóriu ba komandante munisípiu, unidade no departamentu no komandante jerál ho segundu komandante jerál sei partisipa iha kursu ne’e para hatene kona-ba uza forsa.

Kada membru ne’ebé pasa iha kursu ne’e sei uza forsa ka iha direitu atu uza arma. Sira ne’ebé la pasa laiha direitu atu utiliza arma no tenke tuir kursu tinan oin atu bele iha kualifikasaun.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here