Treinadór klube Santa Cruz, Olívio dos Santos

DILI, 30 maiu 2019 (TATOLI)—Aban, 31 maiu 2019, iha Kampu Demokrasia, Bairru Formosa, Dili, tuku 16:00 Otl, sei iha jogu entre Lika-Lika FC  no Santa Cruz FC.

Treinadór hosi klube Santa Cruz, Olívio dos Santos, fó komentáriu katak durante ne’e sira halo ona preparasaun ne’ebé másimu.

“Ha’u hanoin jogu aban ami sei hadau pontu tolu hosi Lika-Lika. Ami asisti ona sira nia jogu. Sira nia fraku iha ne’ebé ami hatene,” tenik Olivio liuhusi konferénsia ba imprensa ne’ebé hala’o iha salaun Xanana Sport Center, Bairru Formosa, ohin.

Nia haktuir, durante ne’e derrota ho ekipa DIT FC sai hanesan evalusaun ba sira hodi haka’as-án hadi’a fallansu hotu ne’ebé iha.

 “Jogu primeiru ami lakon ho DIT sai ona matéria ida ba ami. Tan ne’e, durante ne’e ami haka’as-án hadi’a hotu ona fallansu hirak ne’e. Ne’e duni, ami fiar aban ami manán,” Olívio tenik ho fiar-án.

 Entretantu, treinadór Lika-Lika FC la marka prezensa iha konferénsia ba imprensa hodi fó sira-nia komentáriu kona-ba jogu aban.

Iha jogu primeiru ne’ebé liu ona, Santa Cruz derrota ho DIT ho rezultadu 4-0. Lika-Lika derrota ho FC Lero 2-4. Dadaun ne’e, tabela klasifikasaun provizóriu iha Grup B Segunda Divizaun Liga Futeból Amadora (LFA) époka 2019, lidera hosi DTI ho pontu 6. Segundu, FC Lero ho pontu 3. Terseiru, Sporting Clube de Timor ho pontu 1. Kuartu, Nagardjo FC ho pontu 1 hanesan ho Sporting maibe diferente iha bola. Kintu, Lika-Lika ho pontu 0 hamutuk ho Santa Cruz mak okupa iha pozisaun ikus ho pontu hanesan.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here