Komandante Jerál PNTL, Komisáriu Faustinho da Costa ho nia vise Mateus Fernandes. Imajen/António Gonçalves

DILI, 30 maiu 2019(TATOLI)-Atu prevene konflitu entre grupu juventude sira akontese beibeik iha Dili laran hodi rezulta ema mate, Komandu Polisia Nasionál Timor-Leste (PNTL) husu ba autoridade lokál (xefe suku-xefe aldeia) no komunidade sira, atu koopera informasaun loloos ba polisia.

Komandante PNTL, Komisáriu, Faustino da Costa husu ba autoridade lokál atu informa loloos ba polisia kona-ba movimentu grupu juventude sira ne’ebé kontinua provoka malu no hamosu konflitu iha bairru-bairru.

Komisáriu nee hatete, dala barak polisia la konsege halo atuasaun ho dadi’ak ba problema balun ne’ebé mosu tanba la hetan kooperasaun no kolaborasaun hosi autoridade lokál no sidadaun rasik hodi apoiu atu halo atuasaun ba autór sira.

“Polisia presiza kooperasaun hodi hetan informasaun hosi ema hotu hodi kontribui ba estabilidade,” afirma Komisáriu Faustino da Costa, ba Jornalista sira hafoin relata kazu asidente no insidente durante semana nee ba Prezidente Repúblika, Francisco Guterres Lu Olo, ohin, iha Palásiu Prezidensiál, Bairru-Pite, Dili.

Relasiona ho kazu omisídiu ne’ebé mosu iha munisípiu Baucau no Dili hodi rezulta sidadaun balun mate, Faustino da Costa hatete, hosi kazu nee balun rejista komete hosi grupu organizadu  no balun akontese tanba ódiu no vingansa pesoál.

“Ha’u hakarak hatete en prinsípiu polisia la falla tanba polisia halo hela servisu, se dehan, polisia falla entaun laiha atuasaun no atendimentu ba kazu sira ne’ebé mosu,” afirma Faustino da Costa.

Enkuantu, kazu taa vítima ida iha otél timor nian oin, parte Polisia identifika ona autór ne’ebé deskonfia.

“Akontesimentu iha Dili laran bainhira polisia too iha fatin akontesimentu, ema la kontribui informasaun tanba sempre hatete ami lahatene ema nee (autór) oin foun no hosi bairru seluk, entaun difikulta polisia atu halo servisu,” tenik  Komisáriu Faustino da Costa, hodi dehan mós, parte polisia kontinua garante pás no estabilidade ba povu tomak.

Jornalista   :   Agapito dos Santos

Editór         :   Francisco Simões

HAKEREK NO HATÁN

Please enter your comment!
Please enter your name here