PM Taur Matan Ruak retiru ho membru governu sira. FOTO: GPM

DILI, 30 maiu 2019 (TATOLI) – Oitavu Governu Konstitusionál ne’ebé lidera husi Primeiru-Ministru (PM), Taur Matan Ruak, halo retiru loron ikus ho membru governu sira hodi ko’alia kona-ba prioridade, nune’e bele prepara Orsamentu Jerál Estadu (OJE) 2020 ho di’ak.

Sekretáriu Estadu Komunikasaun Sosiál, Merício Juvenal dos Reis ‘Akara’ informa orientasaun ikus husi Xefe Governu mak oinsá VIII Governu Konstitusionál bele responde preokupasaun sosiál. 

Aproveita loron ikus, Primeiru-Ministru fó orientasaun para hotu-hotu konsentra halo planu didi’ak, para bainhira iha Jornada Orsamentu bele mai ho orientasaun ida-idak para prioridade hotu klaru no hare mós ba preokupasaun públiku, Parlamentu Nasionál (PN), sosiedade sivíl no mídia kona-ba ita nia problema sosiál iha rai laran,”  tenik Sekretáriu Estadu Merício Akara ba jornalista sira iha Palásiu Governu, kinta ne’e.

Hodi hatutan: “Aproveita loron ikus Primeiru-Ministru orienta membru governu hotu para iha parte ida atensaun iha ba prioridade jerál ne’ebé tenke ezekuta hanesan objetivu komún nasaun nian, maibé parte ida labele haluha preokupasaun sidadaun sira”.

Jornada Orsamentál rasik sei realiza iha loron 27 no 28 juñu 2019, “Ita iha tempu fulan ida para prepara bazeia ba retiru ida ne’e para ba hadi’a planu, prioridade didi’ak no orientasaun mak iha ita sei uza hanesan referénsia para ida-idak prepara aan”.

Tuir Governante ne’e, planu orsamentu sei konsentra iha kreximentu ekonomia para hasa’e husi pursentu 7, reduz taza pobreza hodi tuun husi porsentu 10 no reduz taxa dezempregu.

Hodi dehan, Kada tinan estimasaun governu atu kria 60.000 kampu traballu, nune’e iha tinan lima iha 300.000 kampu traballu hanesan saida mak PM mós ko’alia no governu tenke iha estimasaun prosesu ne’e la’o.

“300.000 iha tinan lima hanesan estimasaun Governu, atu kria bazeia husi planu dezenvolvimentu, seidauk inklui dezenvolvimentu setór tersiáriu, turizmu, dezenvolve servisu finansa públika, ida ne’e hotu mak sei tama kategoria kria kampu traballu,” katak governante ne’e.

Nune’e mós iha aspetu tékniku iha ona orientasaun ba membru governu hotu-hotu atu tau atensaun ba jestaun lixu hanesan preukupasaun ema hotu, “Ita sei iha koordenasaun atu oinsá tau-matan ba jestaun lixu. Ministériu relevante tenke hetan apoiu husi ministériu seluk para tau atensaun didi’ak ba preokupasaun liga ho jestaun lixu,” dehan tan sekretáriu estadu.

Nia mós dehan, preokupasaun sosiál ne’ebé hanesan prioridade ba tinan oin mak hanesan hariis fatin públiku, jere vendedór ambulante hodi buka fatin dignu ba sira, terminál ba transporte públiku hanesan mikrolete sira, fó naroman iha sidade Dili, postu seguransa iha fatin públiku, jere patrimóniu estadu ho di’ak, hadi’a Zebra Cross, bee moos no seluk tan.

“Preokupasaun públiku ne’e governu tau atensaun makas no Primeiru-Ministru akompaña didi’ak no tau atensaun, inklui edifísiu públiku sira, fatin públiku seguransa, eletrisidade no preokupasaun sosiál seluk tan,” tenik governante ne’e.

Lee mós notísia: http://www.tatoli.tl/2019/05/mensajen-pm-ba-ezekutivu-sira-asistensia-publika-labele-para/?fbclid=IwAR0xYEGdtSNOilHeHGSgU-CX_r3vPSHIqUgegR9VE1-2PUeGLcdCOoXl3XU

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here