Komandante Unidade Polísia Militár, Majór Abel da Costa Xavier “Niki”

DILI, 30 maiu 2019 (TATOLI)Governu Timor-Leste forma ona komisaun organizadora hodi prepara ba selebrasaun loron Konsulta Populár 30 Agostu 1999 ba dala 20 no selebra 20 Setembru intrervensaun Internasional Force for East Timor (INTERFET) iha Timor-Leste hodi hatán ba krize umanitária no seguransa hosi tinan 1999-2000.

INTERFET lideradu hosi forsa Austrália ne’ebé involve hosi forsa nasaun 21 halo kontribuisaun importante iha tempu susar tebes iha istória Timor-Leste nian.

Relasiona ho loron ne’e, Estadu Timor-Leste sei konvida bainaka importante ka Very Important Person (VIP) kompostu hosi xefe estadu no xefe governu rai li’ur ne’ebé atu mai partisipa iha evetu ne’e iha agostu 2019 nia laran. `

Tanba ne’e, Komandu Polísia Militár (PM) FALINTIL-Forsa Defeza Timor-Leste (F-FDTL) hahú halo ona treinamentu oioin atu koopera ho Komandu Polísia fó seguransa ba bainaka internasionál sira.

 “Ami hein órden tún hosi Komandu F-FDTL para prontu fó seguransa ba ita-nia bainaka hotu,” informa Komandante Unidade Polísia Militár, Majór Abel da Costa Xavier “Niki” ba jornalista sira iha edifísiu Polísia Militár, Kintál-Boot, Dili, ohin.

Nia dehan, bainhira xefe estadu no xefe governu inklui lideransa sira hosi Organizasaun Nasaun Unida (ONU) to’o mai Timor-Leste, Komandu  F-FDTL no PNTL mak hamriik iha oin koopera ho povu TL kria pás no dame hodi bainaka rai li’ur mai partisipa eventu importante ne’ebé TL selebra bele kontente no fila ho alegria.

“Garantia seguransa ne’e labele hare ba militár no polísia de’it, maibé ita timoroan tomak hamutuk mak bele garantia pás ne’e,” katak Niki.

Ba dadaun ne’e, Polísia Militár iha forsa kompañia ida preparadu sei hamutuk ho Polísia Nasionál Timor-Leste (PNTL) hodi aumenta númeru seguransa maka’as liu-tan.

Antes ne’e, Komandante Jerál PNTL, Komisáriu Faustino da Costa informa ona preparasaun seguransa PNTL nian ba Prezidente Repúblika, Francisco Guterres Lú Olo no Primeiru Ministru, Taur Matan Ruak.

“Ami diskuti ona preparasaun seguransa  ne’ebé sei koordena ho Komandu F-FDTL,” dehan Faustino iha Palásiu Governu, Dili, foin lalais.

Entretantu, Komisaun Organizadora ba Aniversáriu ne’e mak ekipa inter-ministeriál ho kna’ar atu jere no koordena aspetu hotu ne’ebé relasiona ho eventu aniversáriu ne’e nian.

Primeiru Ministru, Taur Matan Ruak, fó sai Despaxu nú: 04/PM/II/2019 iha loron 18, fulan Fevereiru, hili Kay Rala Xanana Gusmão, líder Rezisténsia sai hanesan prezidente ba komisaun organizadora ba eventu refere.

Nune’e, komisaun organizadora  hahú hala’o tiha ona nia serbisu hodi prepara ba aniversáriu ne’e.

 

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here