Diretór sesante Muzeu Nasionál, Abílio da Conceição Silva

DILI, 30 maiu 2019 (TATOLI)Governu liuhusi Sekretaria Estadu Arte no Kultura (SEAK) halo   kooperasaun ho peskizadór arkeolojia hosi Universdidade Nasionál Austrália, Universidade iha Amérika no Nova Zelándia, halo peskiza no halo eskavasaun ba objetu kulturál beiala sira nian iha Tutuala-Lospalos, Baucau, Manatuto, Maliana no Ataúro.

SEAK lori ona objetu kulturál sira ne’ebé hetan iha rai okos ne’e ba teste iha laboratóriu. Prosesu datasaun ramata ona no tau tiha ona tuir tinan. Objetu kulturál hirak ne’e, hamutuk tonelada ida ne’ebé dadaun ne’e rai hela ‘Art and Gallery Northeren Territory’ iha Darwin, Austrália.

“Kail ne’ebé antigu liu ne’ebé hetan iha Timor ne’e iha Tutuala kuaze tinan 42.000 ona, molok Kristu moris. Agora ke’e tiha rai kuak sira ne’e, materiál sira ne’e sira halo teste laboratóriu iha Austrália hotu ona. Agora sira fó fila fali mai, governu seidauk bele simu tanba kondisaun ne’ebé ita iha. Teste laboratóriu no datasaun ba objetu sira ne’e hotu ona no tau tiha ona tuir tinan. Soké, sira mós hakarak fó fila fali mai tanba  kuaze sira konta atu besik tonelada ida,” dehan Diretór sesante Muzeu Nasionál, Abílio da Conceição Silva, ba jornalista TATOLI liuhusi entrevista ne’ebé hala’o iha nia kna’ar fatin, Avenida Portugal, Dili, ohin.

Nia hatutan, objetu refere mak hanesan kail, tais, morten, fatuk-ahi ne’ebé uluk beiala sira uza, ahi-anar ne’ebé antigamente beiala sira uza te’in ona, ne’ebé sira hetan iha rai okos, katak uluk ema hela ona iha fatin hanesan Tutuala iha fatin Ilikere-kere, Lene-hara, Lene-cece, Ceny-malae no fatin barak-tan.

Ba prosesu peskiza no eskavasaun ne’e, nia dehan, governu fasilita de’it karta no akompaña peskizadór-sira ba munisípiu hanesan karta ba polísia, xefe suku, administradór munisípiu sira para halo programa sira ne’e la’o ho di’ak. Governu la fó apoiu orsamentu tanba orsamentu mai hosi sira (peskizadór) no dalaruma kolega sira ne’ebé la’o hamutuk ho sira mós, sira mak fasilita.

Bazeia ba teste laboratóriu, Abílio informa, katak foin dadauk iha parte Manatuto mós dehan iha antigu liu, tinan 43.000 liu-ba, ema komesa moris ona iha rai Manatuto bazeia ba sira-nia datasaun tuir rezultadu eskavasaun ne’ebé sira halo.

Aleinde ida ne’e, nia esplika, iha  kolega Alemaña ida ne’ebé halo mós peskiza kona ba ai-to’os iha Lospalos nian. Agora dadauk nia hela iha Alemaña no halo kolesaun privadu ba objetu sira ne’e no nia (peskizadór) iha planu atu lori fila ka halo reptariasaun mai iha Timor-Leste.

“Ha’u fiar katak kona-ba ida ne’e, osan oinsá mós ita tenke buka. Govrenu fó fila de’it ninia osan transporte nian. Ema ne’e dehan, buat ne’ebé imi nian, ha’u tenke fó fila tanba ha’u mós hadomi ida ne’e. Ne’ebé, peskiza ne’ebé durante nia halo ne’e, ita fó apoiu maka’as hosi ita-nia maluk responsável kultura iha Lospalos. Depois rezultadu peskiza, nia sei halo espozisaun ida iha nia rain para ita ba partisipa,” Abílio haktuir.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here