Estátua Don Boaventura. Imajen espesiál

DILI, 29 maiu 2019 (TATOLI)—Sekretaria Estadu Arte no Kultura liuhusi Diresaun Muzeu Nasionál iha planu no programa ne’ebé hala’o mak halo sosializasaun, levantamentu dadus no halo monitorizasaun ba rezultadu peskiza levantamentu ne’ebé liu ona.

Sosializasaun ne’e liliu ba estudante sira no mós ba komunidade kona-ba importánsia papél ka funsaun muzeu para oinsá estudante no komunidade bele proteje nafatin sasán ka objetu beiala sira nian ne’ebé agora dadaun sira rai hela iha sira-nia uma-lulik atu governu bele halo konservasaun.

Programa kolesaun ba objetu sira ne’ebé rai dadun iha uma-lulik sira, agora governu fó ajuda ba halo konservasaun ba bandeira monárkia no karta-patanta iha Suku Estadu-Ermera, bandeira monárkia ida iha Suku Caibada-Baucau no halo konservasaun ba Don Boaventura nia Kolete (rompi) iha Manufahi.

“Don Boaventura ninia kolete, antes ami halo konservasaun kuaze boot sira hakarak ba haree. Talvez sira tau de’it iha bote laran. Don Boaventura ita haree nia foto, kolete ninia asesoris tuun ba ne’e hanesan besi-oan sira be belit iha kolete nia lolon sira ne’e. Kuandu hasai tiha haree dalaruma besi rua ka tolu monu,” dehan Diretór sesante Muzeu Nasionál, Abílio da Conceição Silva, ba jornalista TATOLI liuhusi entrevista ne’ebé hala’o iha nia kna’ar fatin, Avenida Portugal, Dili, kuarta (29/5/2019).

Nia hatutan, governu konserva kolete ne’e oinsá tau fali besi mak agora halo nia fatin hanesan ema-nia isin lolon ne’e, hafoin tau esponza iha laran mak tara kolete ne’e no tau kabér iha vidru laran ne’ebé metin ho kondisaun dignu. Se ema boot sira mai haree, sira haree hosi vidru de’it no labele kaer kaer ona ho liman.

“Tanba, ita-nia komunidade nia tratamentu ba objetu sira ne’e hanesan baibain. Dalaruma sira lulun de’it ka komu hamutuk de’it, sena tama ba bote laran hafoin tau iha uma-lulik nia hadak-lulik nia leten. Ne’e mak ami fó apoiu hodi kria fatin dignu, lulun didi’ak hafoin tau nia paralon para nia iis sai nafatin no to’o tempu iha ami ba loke fali,” nia haktuir.

Prosesu levantamentu dadus, Abílio hateten, kuaze munsípiu iha Timor laran sira tama hotu ona ne’ebé kada munisípiu foti de’it uma-lulik ida iha suku ida tanba limitasaun orsamentu. Se  la halo, aban bainrua malae sira sei lori sai objetu sira ne’e hotu tanba sira bele sosa hosi komunidade sira.

“Nesesidade ekonomia obriga ita, komunidade bele fa’an hotu. Ezemplu, tinan rua liu-ba, ami halo datasaun iha Hahulu, Rai-Masin, Raemarhei (Aileu), maibé dalaruma ami ba halo monitorizasaun fali, objetu sira ne’e balun lakon ona. Ita husu ba dehan, labarik sira eskola be ami fa’an tiha ona. Ida ne’e ita bele lakon istória barak. Tanbasá? Se aban bainrua nia konta, ne’e konta de’it ona maibé realidade retratu ida mós laiha, fisikamente ita la haree,” nia haktuir.

Entretantu, nia informa, governu sei fó apoiu ba komunidade iha Soibada (Manatuto) ne’ebé hakarak harii mini-muzeu Majór Jenerál Don Hipolito Hornai, ne’ebé iha sasán ka objetu antigu sira barak lahalimar hanesan espada no sasán seluk ne’ebé sira rai hela.

“Agora dadaun, governu prepara ona. Sira halo ona uma ida. Iha tempu badak se laiha problema ruma, Estadu sei fó apoiu polytrina—Estadu fó apoiu tau vidru para bele tau sasán sira ne’e iha laran. Ida ne’e bele sai hanesan destinasaun ba turizmu ne’ebé bele konvida ema estranjeiru sira ba haree fatin refere duké buat hotu sentraliza iha Dili,” Abílio haklaken.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here