Komandante Sentru Formasaun (SFP) PNTL Comoro, Dili, Superintendente Arquimino B. L. Ramos

DILI, 30 maiu 2019 (TATOLI)—Sarjentu polísia hamutuk 54 iha tempu besik sei tuir kursu ofisiál inspetór iha Sentru Formasaun Polísia (SFP) iha Akademia Polísia Nasionál Timor-Leste (PNTL), Comoro, Dili.

Komandante Sentru Formasaun Polísia (SFP), Superintendente Arquimino B. L. Ramos dehan, ajente sira ne’e sei hahú sira nia kursu iha loron 3 jullu 2019 durante fulan sia hodi promove diviza sarjentu ba ofisiál inspetór.

“Sarjentu polísia 54 ne’ebé teste liu ona sira sei hahú sira nia kursu ba ofisiál durante fulan sia (9) iha sentru formasaun ne’e,” dehan Komandante Ramos ba Agência Tatoli iha nia kna’ar fatin, ohin.

Nia haktuir, antes ne’e, Komandu PNTL loke vaga ba sarjentu 75 maibé iha teste hetan de’it sarjentu polísia 54 maka pasa iha vaga.

Sarjentu sira ne’e sei hetan formasaun husi instrutór polísia timoroan hamutuk ho instrutór Guarda Nasionál Republikana (GNR) nian haat, instrutór husi Nova Zelándia no Polísia Federál Austrália.

“Durante kursu ita-nia kandidatu ofisiál sira ne’e sei apriende módulu treinamentu oioin hodi hariku sira nia koñesimentu iha lei ne’ebé liga liu ho serbisu polísia no seluk-tan,” nia dehan.

Superintendente Arquimino hatutan, módulu haat maka kandidatu sarjentu sira sei hetan iha formasaun maka hanesan apriende lei polísia, kódigu penál, kódigu prosesu penál, kódigu estrada, regulamentu disiplinár, lei orgánika PNTL no formasaun tiru.

Aleinde ida ne’e, sei fó mós formasaun modelu tékniku profisionál oinsá apriende halo investigasaun ida di’ak, tránzitu, intelijénsia nian, apriende serbisu polísia komunitária nian no módulu formasaun jerál apriende kona-ba serbisu Siénsia no Teknolojia (IT), língua inglés, tétun hodi akompaña mundu globalizasaun.

Iha parte seluk, nia afirma, SFP mós hasoru defikulidade liliu bainhira fó formasaun ba membru polísia foun sira atu ba munisípiu laiha transporte entaun tenke buka kontatu fali unidade seluk hodi ajuda transporte.

Difikuldade seluk tan, Arquimino salienta, maka sei menus ekipamentu formasaun hanesan kapasete no forsa, gás treinamentu nian no fasilidade seluk-tan. Tanba atu forma polísia ida ho formasaun profisionalizmu tenke apoia lojístika no investe osan maka’as.

Tan ne’e, komandante ne’e espera governu bele tau konsiderasaun hodi responde ba defikuldade hirak ne’e tuir orsamentu.

Jornalista: Eugénia Pereira

Editór: Xisto Freitas

HAKEREK NO HATÁN

Please enter your comment!
Please enter your name here