Estudante no juventude sira ne’ebé mak partisipa ona iha programa JENESYS. Foto: MOP

DILI, 28 maiu 2019 (TATOLI)– Embaixada Japaun iha Timor-Leste organiza atividade JENESYS (Japan-East Asia Network of Exchange for Students and Youths) 2018 reporting  season (sesaun reportajen) no partisipa mós husi Ministru Obras Públika (MOP), Salvador Pires no Reitór Universidade Nasionál Timor Lorosa’e (UNTL), Francisco Miguel Martins.

Ministru Salvador Pires hateten katak JENESYS ne’e hanesan programa interkámbiu entre governu Timor-Leste no Japaun, ne’ebé iha konkordánsia lori joven husi nivel oioin hodi vizita Japaun durante semana rua hodi bele aprende kona-ba programa ne’ebé governu japaun organiza ho tópiku oioin, ne’ebé liga ho dezenvolvimentu Japaun nian no mós seluk tan.

“Durante fila mai Timór, estudante sira halo planu asaun rasik, hamutuk ho komunidade sira hamoos tasi, ida ne’e hanesan meius ida atu sira bele integra saida maka sira aprende iha ne’ebá,” hateten Ministru Salvador Pires ba jornalista sira iha edifísiu Embaixada Japaun, Praia dos Coqueiros, tersa (28/08).

“Maibé ida ne’e prosesu aprendizajen ida no ida ne’e parte ki’ikoan, komponente ki’ik ida, sira ba aprende husi sivilizasaun Japaun nian no prosesu dezenvolvimentu saida maka Japaun atinje, hanesan faze ida atu estudante timoroan sira bele kontinua nafatin, pois aban bairua bele util ba sira-nia koñesimentu rasik bainhira sira asume pozisaun ka kna’ar ruma iha sosiedade nia laran aban bairua,” reforsa tan governante ne’e.

Ministru Salvador Pires mós haktuir katak durante vizita ba Japaun, estudante sira hetan oportunidade hodi rona esplikasaun kona-ba métodu transformasaun líkidu gás sai ba gás, uza enerjia renovável termál tasi nian, uza solár panel no resiklajen.

Nune’e mós, hetan oportunidade vizita fatin ne’ebé nia kondisaun jeografia hanesan mós Dili; besik tasi, ne’ebé tempu uluk Japonés sira harii kanál hodi “halibur” udan-been no uza bee husi udan-been ne’e ba objetivu turizmu no mós sai kanál ba agrikultura no bee moos.

“Ida ne’e ezemplu di’ak atu ita-nia joven sira aprende no lori mai bele implementa iha Timór ho kualker maneira tuir sira-nia funsaun iha sosiedade nia leet,” konsidera ministru.

Iha fatin hanesan, Reitór UNTL, Francisco Miguel Martins hateten, atividade ne’e hanesan partilla informasaun kona-ba saida mak estudante sira hetan iha Japaun no lori mai fahe iha Timor-Leste. Akadémiku ne’e orgullu mós ba atividade JENESYS ne’e tanba husi 2010 to’o agora kuaze ema na’in 1000 no metade husi ne’e estudante UNTL.

“Nune’e sira mós forma alumni.  Ida ne’e atividade ida di’ak no bele hatutan fila fali, bele lori saida maka sira aprende tau iha realidade,” dehan reitór.

Reitór mós espera katak ho partisipasaun iha programa JENESYS, individuál sira bele muda sira-nia atitude individualmente tanba mudansa mai husi indivídu mak ba grupu.

Tuir Reitor ne’e katak partisipasaun sira nian iha programa ne’e aprende mos kona ba kultura, teknolojia, edukasaun, disiplina, attitude, bele halo sira ser indiidu muda sira nia attitude individualmente tanba mudansa mai husi individu maka ba grupu.

Nune’e mós espera katak atividade idéntika sei akontese mós iha tinan oin. “Ita hein katak tinan oin mai sei iha nafatin tanba nia efeitu no importante; kapás tebes forma atitude, saida maka sira aprende, sira-nia atitude mós troka, tenke hahú husi uma no sira-nia an rasik tiha maka ba sosiedade,” konsidera reitór.

Lee mós notísia: http://www.tatoli.tl/2017/05/programa-jenesys-nee-oportunidade-ba-timoroan/

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here