Primeiru-Ministru, Taur Matan Ruak ho membru Governu sira halo retiru daruak. FOTO: GPM

DILI, 29 maiu 2019 (TATOLI) – Em termu polítika, governu sempre ezije para membru governu sira tenke kompletu maibé bainhira seidauk kompletu nu’udar governu no estadu tenke kontinua la’o.

Sekretáriu Estadu Komunikasaun Sosiál, Merício Juvenal dos Reis ‘Akara’ haktuir, iha retiru Primeiru-Ministru (PM), Taur Matan Ruak ho membru governu VIII Governu Konstitusionál, Xefe Governu fó mensajen ba ezekutivu sira, maske ho kondisaun mínima maibé asisténsia públika labele para, tenke kontinua la’o no serbí.

Sekretáriu Estadu Komunikasaun Sosiál, Merício Juvenal dos Reis Akara. Imajen Egas Cristovão

“Kareta roda tolu mas sei atinje nia objetivu, tanba serbí sein limite no labele mengeluh (suspira) beibeik no saida mak iha kontinua, labele hein buat di’ak hanesan membru governu kompletu mak di’ak,” garante sekretáriu, Merício Akara ba jornalista sira iha Palásiu Governu, kuarta ne’e.

Tuir Governante ne’e, kompromisu no espíritu ne’e mak ita kaer, tanba ne’e ita hein nafatin para membru governu hotu bele hetan tomada posse para kompletu, maibé servisu balun mak sei kontinua halo tanba ne’e mak membru governu balun tenke asume responsabilidade rua ou tolu.

“Ida ne’e hatudu katak ho kondisaun saida de’it atu serbí ba povu ne’e kontinua ho espíritu, commitment (kompromisu) atu fó asisténsia másimu tenke la’o, ida ne’e mak orientasaun husi Primeiru-Ministru,” dehan tan governante ne’e.

Nune’e, Governu nafatin hein Prezidente Repúblika atu bele fó tomada pose hodi membru governu sira servisu di’ak liu no atendimentu sei fasil liu.

“Orsamentu ba tinan 2020 ita preparadu no membru governu ne’ebé asume kargu barak sempre prontu tanba Primeiru-Ministru orienta ho kondisaun saida de’it tenke la’o,” kompromete sekretáriu estadu.

Kona-ba Lei Orgánika, nia informa maioria promulga no publika ona no hela oituan mak sei iha prosesu maibé la difikulta Governu halo preparasaun ba oin tanba ida-idak asume ninia responsabilidade.

“Liga ho lei orgániku prosesu atu finál ona no hein prosesu promulgasaun maibé maioria promulga no publika ona no balun iha prosesu promulgasaun. Lei orgánika balun mak seidauk maibé la-fó inpaktu signifikante,” tenik governante ne’e.

Lee mós notísia: http://www.tatoli.tl/2018/08/pm-profisional-liu-se-lori-kareta-roda-tolu/

http://www.tatoli.tl/2019/05/lei-mak-matadalan/?fbclid=IwAR1YE8Ufd__94kDzkztg2rybFpl3o_62kKy7gYchLYJxAsZFlo_8VLiC2Uk

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here