Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur. Imajen/Egas Cristovão

DILI, 29 maiu 2019 (TATOLI)-Xefe Estadu Maiór Jenerál FALINTIL-Forsa Defeza Timor-Leste, Majór Jenerál, Lere Anan Timur, apela ba Timoroan hotu atu evita ódiu no vingansa hodi kontinua oho malu.

Lere Anan Timur consider katak ódiu malu no oho malu  sei la kontribui ba estabilidade ba dezenvolvimentu nasaun nian.

Majór Jenerál Lere preokupa no triste ho kazu oho malu ne’ebé akontese iha territóriu Timor-Leste, hahú hosi kazu oho malu iha Munisípiu Baucau, mai Postu Administrativu Vemasse,  Jardim Ótel Timor nia oin, Zita plaza  no fatin seluk tan.

“Ha’u husu ba joven no sesé de’it oho malu ne’e tempu liu ona, tanba agora la’ós atu oho malu, agora ne’e  ita buka oinsá para halo dezenvolvimentu,” afirma Lere Anan Timor, hafoin partilla  asuntu ne’e ho Prezidente Repúblika, Francisco Guterres Lu Olo, ohin, iha Palásiu Prezidensiál Bairru-Pite, Dili.

Nia fó sasin katak, durante funu kontra invazaun militarizmu indonéziu nian  iha Timor-Leste halo Timoroan sira oho malu tanba buka liberta nasaun ne’e, maibé ohin loron oho malu, ne’e Lere konsidera la’ós ona timoroan tanba buka destroi fali nasaun.

“Nia la’ós timoroan, lakohi ukun aan hodi  fó nia fuan no domin ba rai ida ne’e tanba ema barak soe nia isin no fakar ran ba rai ida ne’e,” tenik Lere Anan Timur.

Nia husu mós atu sidadaun hotu tenke iha nasionalizmu ba ninia rai rasik hodi hametin unidade atu kria estabilidade no apoiu dezenvolvimentu nasaun.

Nia  husu mós ba lider nasaun no lider rezisténsia atu tur hamutuk hodi hametin unidade  hodi mantein estabilidade.

Jornalista     : Agapito dos Santos

Editór           : Francisco Simões

 

 

HAKEREK NO HATÁN

Please enter your comment!
Please enter your name here