Sekretáriu Estadu Komunikasaun Sosiál, Merício Juvenal dos Reis Akara. Imajen Egas Cristovão

DILI, 29 maiu 2019 (TATOLI)-Sekretáriu Estadu Komunikasaun Sosiál (SEKOMS), Merício Juvinal dos Reis “Akara” konsidera,bele iha deferénsia opiniaun kona-ba kestaun ruma maibé ita tenke jere didi’ak hodi ikus liu lei mak sei sai matadalan hodi guia ita.

Ezemplu, liga ba problema kona-ba rai, iha lei balun mak tenke diskute liután, nune’e mós ohin Ministru Justisa, Manuel Cárceres mensiona deferénsia ideia kona-ba planu atu hola material PCIC (Polísia Sientífika no Investigasaun Kriminál-sigla portugés), iha diferensa opiniaun.

“Bele iha deferénsia ideia maibé kuandu lei dehan nune’e, ita sei implementa no kuandu autoriza ita sei ezekuta,” hateten sekretáriu estadu, hafoin partisipa retiru entre Primeiru-Ministru, Taur Matan Ruak ho membru Governu VIII hodi diskute kona-ba prioridade, hodi bele prepara Orsamentu Jerál Estadu (OJE) 2020 ho di’ak.

Governante ne’e reforsa: “Deferénsia ideia iha ezekusaun mak halo ita la’o neineik uitoan no kuaze ministériu hotu iha deferénsia iha aproximasaun, implementasaun, ideia, tanba ne’e haree ba aspetu lei. Bele lei ne’e soke fali lei seluk, tanba ne’e mak servisu ida mós husi MRLAP sei hadi’a no mós dezafiu balun mak ami hakarak dehan”.

Nia haktuir, kuandu plenária iha kada segunda no tersa, membru Parlamentu Nasionál sira sempre kestiona kona-ba problema servisu públiku no infraestrutura bázika, tanba ne’e governu hanoin ba oin presiza iha konsentrasaun no koordenasaun di’ak para bele responde preokupasaun ne’ebé deputadu sira preokupa.

“Ami konsidera preokupasaun husi membru parlamentu sira, husi sosiedade sivíl, mídia, ami konsiente no konsidera, nune’e bele tau atensaun no governu sei halo planu di’ak atu iha koordenasaun servisu para ita bele responde”.

Tuir Akara, seidauk iha difikuldade ne’ebé konsidera boot no labele la’o ba oin, maibé iha mak difikuldade téknika balun mak tenke rezolve.

Lee mós notísia: http://www.tatoli.tl/2019/05/prioridade-viii-governu-2020-bem-estar-dezenvolvimentu-setor-produtivu-no-konektividade/

http://www.tatoli.tl/2019/05/preparasaun-orsamentu-2020-pm-fo-hanoin-hamenus-despeza-korrente/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here