iklan

NASIONÁL, EKONOMIA, DILI

Governu Sei Prepara Fatin Dignu Ba Atleta Potensiál

Governu Sei Prepara Fatin Dignu Ba Atleta Potensiál

Sekretáriu Estadu Juventude no Desportu, Nélio Isaac. Foto Tatoli/António Gonçalves

DILI, 29 maiu 2019  (TATOLI)—Sekretáriu Estadu Juventude no Desportu, Nélio Isaac Sarmento, hateten prioridade Sekretaria Estadu Juventude no Desportu (SEJD) ba tinan 2020 sei prepara fatin dignu ba atleta potensiál sira.

Nia dehan, governu sei hadi’a infraestrutura bázika, liliu hanesan kampu ba atleta sira nune’e atleta sira bele treina ho di’ak hodi prepara-án ba atividade nasionál ho atividade internasionál.

“Kuandu atividade nasionál ne’e halo no ita hetan selesaun nasionál didi’ak, presiza lori ba konsentra iha fatin ida hodi halo preparasaun no haree mós sira-nia edukasaun, sira-nia hahán no sira-nia fíziku,” governante ne’e ko’alia iha Palásiu Governu, kuarta ne’e.

Nélio hatutan, atleta sira ne’ebé iha poténsia sei toma-konta hosi péritu balun tuir modalidade ida-idak nian para bainhira atleta sira ba partisipa iha eventu internasionál, sira iha ona preparasaun ne’ebé sufisiente

“Atividade nasionál ne’e tenke iha atu promove kada federasaun no identifika atleta nasionál ne’ebé iha poténsia hodi konsentra iha fatin ida ne’ebé Estadu maka foku hodi kuidadu sira,” Nélio informa.

Federasaun sira ne’ebé eziste iha Timor-Leste mak hanesan Atletizmu, Boxe, Siklizmu, Futeból, Tenis Kampu, Tiru, Taekwondo, Natasaun, Karatedo, Silat Natasaun, Halterufilizmu no Voliból.

Jornalista: Evaristo Soares Martins

Editór: Xisto Freitas

iklan
iklan

Leave a Reply

iklan
error: Content is protected !!