Ministru Transporte no Komunikasaun, José Agostinho da Silva. Imajen António Goncalves

DILI, 29 maiu 2019 (TATOLI) – Governu liuhosi Ministériu Transporte no Komunikasaun (MTK) planeia sei sosa Ró Berlin Nakroma 2 iha 2020.

“Iha tinan 2019-2020 polítika Ministériu Transporte no Komunikasaun ninia planu ona oinsá halo konstrusaun Ró pasajeiru Berlin Nakroma 2, tan ne’e iha loron 31 fulan ne’e sei ofisializa akordu entre Governu Timór-Leste no Alemaña”, hateten Ministru Transporte no Komunikasaun, José Agostinho da Silva, ba jornalista sira iha Palásiu Governu, ohin.

José Agostinho da Silva afirma orsamentu ba konstrusaun ró refere orsamentu hosi Governu Timór-Leste no Governu alemaña.

“Presiza hatene katak konstrusaun ba ró ahi ne’e ninia orsamentu ho finansiamentu kontrapartida Governu Timór-Leste ho Governu Alemaña. Hosi Governu Alemaña hamutuk milliaun Euro hitu no Timór-Leste milliaun $17”, afirma José Agostinho da Silva.

Nia hatutan parte dahuluk Governu TL asegura ona ba projetu ne’e ho montante milliaun $5. Hafoin asina akordu entre Governu rua maka konstrusaun ne’e hahú ona. Tuir planu konstrusaun Ró Berlin Nakroma 2 sei halo iha Xina.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here