Ministru Saúde, Bonifácio Maukoli dos Reis. Imajen Egas Cristovão

DILI, 29 maiu 2019 (TATOLI) – Governu da-ualu, liu hosi Ministériu Saúde (MS) planeia ona atu halo estensaun ba Ospitál Nasionál Guido Valadares (ONGV) iha tinan 2020.

Ministru Saúde, Bonifácio Maukoli dos Reis, hateten antes atu hahú konstrusaun sei prepara uluk planu mestre.

“Ami koopera ona ho ministériu obra públika hodi halo planu mestre hodi halo estensaun ba Ospitál Nasionál Guido Valadares hahú no sei realiza iha tinan 2020”, hateten Bonifácio ba TATOLI iha Palásiu Governu, ohin.

Maukoli subliña orsamentu ba estensaun ne’e tau iha Orsamentu Jerál Estadu tinan 2020. “Planu estensaun ne’e durante tinan lima no fazeadamente, ne’ebé Ospitál ne’e ami sei moderniza hotu”, akresenta Maukoli.

Bainhira husu orsamentu ba estensaun, Governante ne’e seidauk bele informa maibé sei prevee iha OJE 2020.

Iha parte seluk, Diretór Jerál ONGV, Aniceto Cardoso Barreto, salienta kondisaun Ospitál hanesan; sanita (hariis fatin), no kuartu ba pasiente sira aat ona.

Tuir nia kondisaun sira ne’e sai fatór ida hodi lori moras seluk ba pasiente sira. “Ha’u hanoin tempu to’o ona atu halo konstrusaun foun, tanba konstrusaun Ospitál ne’e antigu tebes ona”, katak.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here