Sekretáriu Estadu ba Protesaun Sivíl, Alexandrino de Araújo. Imajen/António Gonçalves

DILI, 29 maiu 2019 (TATOLI)Governu liuhusi Diresaun Nasionál Protesaun Sivíl lori ona ajudu umanitária hodi fó apoiu emerjénsia ba negosiante kuaze ema na’in 10 ne’ebé infrenta dezastre inséndiu iha merkadu foun iha Aldeia Belebatu, Suku Ailili, Munisípiu Manatuto.

Dezastre inséndiu ne’e akontese iha tersa (28/5/2019) tuku oras tuku 20.00 Otl. Akontesementu ne’e la rezulta ema ruma mate, maibé estraga negosiante sira nia kioske liu 10 no sasán mak ahi han hotu.

“Konforme relatóriu fó hatene iha vítima 10 resin ne’ebé infrenta inséndiu ne’e. Ami sei halo enkontru hodi hatene klaru dadus para fó kedas apoiu ba vítima sira,” dehan Sekretariu Estadu Protesaun Sivíl (SEPS), Alexandrino Xavier Araújo, ba jornalista iha Palásiu Governu, Dili, ohin.

Nia dehan, governu agora prepara ona foos ne’ebé hetan apoiu hosi Sentru Lojístika Nasionál (CLN) atu atende dezastre refere.

Kona-ba kioske sira ne’ebé ahi han, Alexandrino dehan, se sasán uma merkadu ne’e pertense ba Estadu nian, maka Estadu iha responsabilidade atu hadi’a no harii fila fali kioske foun hodi fasilita negosiante sira kontinua halo negósiu. Maibé, kioske ne’e negosiante sira maka harii rasik, governu sei fó de’it apoiu emerjénsia hanesan kalén no simente no sasán seluk-tan.

Kona-ba motivu hosi inséndiu ne’e, ekipa tékniku EDTL, Komandu Polísia Manatuto no Bombeiru sei halo investigasaun. “Polísia Manatuto mak sei halo investigasaun kle’an kauza ne’e oinsá,” katak nia.

Alexandrino hatutan, ekipa polísia, Bombeiru inklui autoridade lokál komesa hamoos ona fatin inséndiu hodi normaliza fila fali atividade negósiu iha merkadu ne’e.

Jornalista: Eugénio Pereira  

Editór: Xisto Freitas

HAKEREK NO HATÁN

Please enter your comment!
Please enter your name here