DILI, 29 maiu 2019 (TATOLI)—Sekretáriu Estadu Juventude no Desportu, Nélio Isaac Sarmento, hateten alteta Teófilo Freitas ho atleta sira seluk sei simu subsídiu iha tempu badak.
“Ita agora atu halo ona prosesu CPV (Cost-Per-View). Iha meiu rua. Ida, ita transfere ba iha ninia konta bankária. Rua, ita transfere ba konta bankária Federasaun ka Komité Paralímpiku mak halo atribuisaun prémiu ba Teófilo, tanba sira iha regra internál ne’ebé sira tenke rezolve. Maibé, governu prepara ona. Hein prosesu de’it. Maizumenus semana oin,” Sekretáriu Estadu Juventude no Desportu, Nélio Isaac Sarmento, ko’alia ba jornalista sira iha Palásiu Governu, ohin.
Maibé, nia esplika, proposta ne’e tenke mai hosi Komité Paralímpiku Nasionál Timor-Leste (CPNTL-sigla portugés) kona-ba subsídiu ho atleta sira seluk ne’ebé hatudu prestasaun di’ak iha eventu internasionál.
“La’ós ba Teófilo de’it. Ba mós futeból. Federasaun sira nian ne’e tenke hato’o proposta bazeia ba orsamentu ne’ebé Komisaun Nasionál Desportu aprova ona. Bazeia ba ida ne’e mak ita halo prosesu. Ezemplu, orsamentu inisiál rihun $100.00 no atleta sira seluk ho totál orsamentu hamutuk rihun $180.00,” tenik Nélio.
Nia dehan, atleta sira ne’ebé hetan subsídiu ne’e tanba hetan prémiu iha tinan 2018 liu-ba. Nia hateten, orsamentu ba atleta Téofilo Freitas no atleta sira seluk, sei laiha mudansa, bazeia de’it ba orsamentu inisiál ne’ebé governu promete ona.
Jornalista: Evaristo Soares Martins
Editór: Xisto Freitas