DILI, 29 maiu 2019 (TATOLI)—Jogu aban loraik desizivu. Jogu ida ne’ebé ho rítmu aas. Tanba, klube rua ne’ebé naran boot hosi Munisípiu Dili sei hasoru ekipa naran boot hosi Manufahi. Jogu entre Porto Taibessi FC no Kablaki FC.
Seidauk hatene sé mak atu manán sé. Klube rua la reseiu malu. Treinadór hosi parte rua fó komentáriu katak sira preparadu. Treinadór Porto Taibessi FC, João Pereira hateten, durante fulan ida resin nia prepara jogadór sira ho másimu atu hasoru Kablaki.
“Durante fulan ida resin ha’u prepara jogadór sira ho másimu. Hosi ne’e ha’u fiar katak aban ami sei hatudu jogu ne’ebé di’ak nune’e bele hadau pontu tolu,” tenik João liuhosi konferénsia imprensa ne’ebé hala’o iha salaun Xanana Sport Center, Bairru Formosa, Dili, ohin.
Entretantu, formatu ne’ebé Porto Taibessi utiliza iha aban mak 4, 3, 3. Tanba ne’e hakarak lakohi aban sira sei esforsu hodi halo kontra atake ne’ebé maka’as.
Iha fatin hanesan, treinadór Kablaki, Romão Guterres konfesa, pontu tolu ba sira iha jogu aban metin ona iha siria nia liman. Treinadór ne’e dehan, durante ne’e sira asiste ona Porto nia jogu ho nune’e mak nia optimista nia ekipa sei manán.
“Ami iha ona planu atu hasoru ekipa Porto Taibessi ne’ebé maka naran boot iha kapitál Dili hanesan mós klube sira seluk. Ami hakarak hatudu jogu ne’ebé di’ak hodi hatudu katak ami Same mós maka’as la’ós Dili de’it,” tenik Romão.
Formatu jogu hosi ekipa Manufahi treinadór ne’e lakohi fó sai tanba konfidensiál. Prevene ekipa adversáriu hatene.
Jogu aban entre ekipa rua ne’e hanesan ne’e nu’udar jogu jornada 2 Segunda Divizaun Liga Futeból Amadora (LFA) époka 2019 ne’ebé sei hala’o iha Kampu Demokrasia, aban (30/5/2019) tuku 16:00 Otl.
Iha jornada 1, Porto Taibessi lakon ho Aitana ho rezultadu 4-1. Kablaki manán Zebra FC ho rezultadu 5-1. Enkuantu, provizoriamente, Fitun Estudante Lorosa’e (FIEL) mak dadauk ne’e lidera hela tabela klasifiksaun provizóriu iha Grup A ho pontu 4. Kablaki okupa iha segundu lugár ho pontu 3. Terseiru, Aitana FC ho pontu 3 hanesan ho Kablaki maibé diferente ho bola tanba Kablaki nia rezultadu bola barak liu Aitana. Kuartu, Cacusan ho pontu 1. Porto Taibessi no Zebra okupa ikus liu ho pontu mamuk.
Entretantu, klube hirak ne’ebé iha Grup B maka hanesan DIT FC, Lero FC, Sporting de Timor, Nagardjo, Lika-Lika no Santa Cruz.
Jornalista: Mídia LFA
Editór: Xisto Freitas
