Sekretáriu Estadu Ambiente, Demétrio do Amaral de Carvalho. Imajen/Egas Cristovão.

DILI, 29 maiu 2019 (TATOLI)-Governu Timor-Leste liuhosi Sekretáriu Estadu  Ambiente (SEA) iha ona alvu atu to’o iha tinan 2030, Timor-Leste bele sai ona nasaun ida ne’ebé plastic neutral. Katak, laiha tan plástiku soe ba lixu fatin.

“Timor-Leste hakarak to’o 2030, se bele ita hakarak sai ona nasaun ida ne’ebé plastic neutral. Ne’e dehan, laiha tan plástiku ita soe ba lixu fatin, plástiku ita iha mekanizmu ona atu halo resiklajen ka ita konverte ba produtu seluk, ida ne’e mak ita hakarak,”  Sekretáriu Estadu Ambiente (SEA), Demétrio do Amaral de Carvalho, afirma, ohin, iha ámbitu konsultasaun públika kona-ba ezbosu polítika zero plástiku ne’ebé halo hosi SEA, Programa Nasaun Unida ba Dezenvolvimentu (PNUD) no Uniaun Europeia (EU)  iha Otél Ramelau, Dili.

Nia esklarese katak, polítika zero plástiku hanesan dokumentu ida ne’ebé bele dehan sai matadalan ba programa zero plástiku.

“Programa zero plástiku ne’ebé suporta hosi prosesu lejizlasaun ne’ebé agora ita halo hela, dekretu lei eliminasaun plástiku uzu úniku no embalajen sira. Dekretu lei aprezenta iha Konsellu Ministru presiza tan dokumentu ruma atu suporta para hetan aprovasaun, maibé projetu lei ne’e iha tiha ona.”

Polítika zero plástiku ne’e UNDP mak finansia hodi dezenvolve hosi konsulta públika ho liña ministeriál, Organizasaun Non Governamentál (ONG) no akadémiku sira kontein sumáriu kona-ba saida mak Timor-Leste hakarak halo to’o iha 2030.

Iha polítika zero plástiku ne’e iha rekomendasaun lubuk ida atu Governu bele tau iha konsiderasaun iha nia implementasaun iha futuru.

Ezbosu polítika zero plástiku ne’e dezenvolve hosi UNDP no konsulta ho Governu ne’ebé nia konteúdu ne’e bazeia ba kontestu ne’ebé konsulta ho liña ministeriál sira, ONG, akadémiku, atu fó opiniaun kona-ba situasaun Timór nian iha relasaun ho plástiku.

“Dekretu lei aprezenta tiha ona, dokumentu ne’e (ezbosu polítika zero plástiku) sira ohin konsulta, hadi’a tiha, semana oin ,submete mai ha’u-nia fatin, ha’u hodi bá Konsellu Ministru,” hateten Sekretáriu Estadu Demétrio do Amaral de Carvalho.

Biban ne’e, Konsultora Nasionál UNDP Dircia Sarmento Belo, ne’ebé aprezenta ezbosu ida ne’e esplika, polítika zero plástiku halo ona konsultasaun ho entidade sira katak iha problema ne’ebé sira identifika, dahuluk mak relasiona ba poluisaun plástiku nian, liuliu lixu plástiku uzu úniku hanesan ákua, supermierinso, no sai problema boot ne’ebé daudaun ema hotu haree. Kestaun daruak, Timor-Leste sei falta jestaun sustentavel ba lixu plástiku no mós separasaun lixu iha baze.

“Iha problema datoluk, ita mós sei falta produtu alternativu ne’ebé mak biodegradavel no problema seluk ne’ebé ami identifika, ita sei falta mós resiklajen liuliu hosi eskala médiu to’o boot. Agora daudaun eziste mak eskala ki’ik tebes hanesan halo ai-funan, halo pasta. Problema ikus liu ami identifika katak ita-nia sensibilizasaun kona-ba problema plástiku iha rai-laran sei menus tebes,” Dircia Belo hateten.

Dircia haktuir, vizaun ba polítika zero plástiku nian boot tebes no garante atu plástiku ne’ebé uzu dala-ida sei livre iha Timór, ba Timór ne’ebé matak iha 2030.

Objetivu hosi polítika ne’e mak sei halakon plástiku uzu dala-ida iha etapa pur etapa, no dezenvolve mós alternativa ne’ebé sustentavel no insentiva ba atividade sira ne’ebé suporta ba ambiente. Aléinde ne’e, hadi’ak liután jestaun lixu iha Timor-Leste ne’ebé aliña ho ierarkia lixu nian.

Objetivu seluk, minimiza risku ba saúde ema nia no ambiente no atu enkoraja mós sírkulu ekonomia hodi fó mós postu traballu ba ema hotu. Objetivu tuirmai, identifika trajetu ou dalan ne’ebé espesífiku atu atinje objetivu no misaun, no objetivu seluk mós mak adota kontestu lokál hanesan envolvimentu komunitáriu atu komunidade sira sente katak sira na’in duni ba rai ne’e no ikus mak atu define funsaun no responsabilidade instituisaun relevante.

Jornalista      : Maria Auxiliadora

Editór            : Francisco Simões

HAKEREK NO HATÁN

Please enter your comment!
Please enter your name here