Kafé Timór. Imajen/Google.

DILI, 28 maiu 2019 (TATOLI)-Entre tinan 2019 to’o 2030, Planu Nasionál ba  Dezenvolvimentu Setór Kafé (PNDSK) Timor-Leste, iha trajetu abranjente rua, kompostu hosi hasa’e produsaun kafé dobru no aumenta rendimentu esportasaun kafé to’o porsentu 270.

Trajetu PNDSK nian ne’e nu’udar kompromisu PNDSK nian ne’ebé lansa ona hosi Ministru Agrikultura no Peska, Joaquim José Gusmão dos Reis Martins.

Diretór Nasionál Kafé no Plantasaun Indústria, Ministériu Agrikultura no Peska (MAP), Fernando Santana, informa, iha objetivu kuantitativu PNDSK ezije ba aumentu signifikativu iha produtividade no melloria ba kualidade durante halo planu ne’e no objetivu longu prazu xave sira atu realiza durante períodu implementasaun planu mak halo produsaun Kafé Timor-Leste sa’e dala-rua no iha 2030 to’o tonelada 20.000 kada tinan, kualidade aumenta signifikativu no sai hanesan sasukat ida liuhosi persentajen hosi grau ne’ebé fa’an ho nivel presu espesialidade no prémiu to’o iha 2030  no aumentu 270% hosi valór esportasaun Kafé Timor-Leste nia to’o iha 2030.

“Objetivu kuantitativu sira ba 2030, ita haree ba parte situasaun atuál (produsaun totál tonelada 10.000 ho valór millaun $27) grau espesialidade iha dolar lima kada kilograma ba leten iha porsentu 2, grau prémiu dolar tolu to’o dolar 4.99 kada kilograma iha porsentu 34, grau komersiál to’o iha dolar 2.99 kada kilograma ne’e porsentu 64″.

“Ba vizaun 2030 produsaun totál tonelada rihun 20 ho valór millaun 73 ne’ebé iha grau espesialidade dolar lima pur kilograma ba leten ne’e porsentu 10, grau prémiu dolar 3 até 4.99 pur kilograma ne’e porsentu 60 no grau komersiál to’o dolar 2.99 pur kilograma ne’e porsentu 30 ,” Fernando Santana, afirma, ohin, iha lansamentu PNDSK iha Otél Timór.

Diretór Nasionál ne’e dehan, PNDSK iha área foku neen mak peskiza no dezenvolvimentu, produsaun no produtividade, kualidade no akréximu valór, asesu ba merkadu no promosaun, konsumu doméstiku no turizmu Kafé no jestaun no koordenasaun iha setór Kafé.

PNDSK adota vizaun ba longu prazu hodi hadi’ak setór Kafé no sei implementa durante tinan 12 bá oin hodi kobre períodu husi 2019 to’o 2030.

Esforsu ne’e sei nesesita investimentu boot ba kustu operasionál no jestaun rekorrente (fiksu) atu implementa planu no kustu investimentu adisionál nesesáriu atu hasa’e produtividade setór nian liuhusi inisiativa sira hanesan reabilitasaun no renovasaun ba plantasaun Kafé. Objetivu planu nian mak atu hasa’e dala-rua produsaun husi tonelada 10.000 kada tinan to’o 20.000 to’o iha 2030.

“Kustu rekorrente mak sukat ho montante maizumenus $500.000 ba 2019 ho aumentu neineik sa’e to’o porsentu 5 kada tinan durante períodu implementasaun planu nia. Montante totál atu kobre kustu hirak ne’e maizumenus millaun 8”.

Fernando aprezenta katak PNDSK sei estabelese alvu ida atu reabilita ektare 30.000 ou meiu (1/2) hosi área plantasaun Kafé totál ektare 60.000 ho kustu estimativa $1000 kada ektare. Orsamentu totál ba esforsu ne’e mak millaun $30 durante períodu planu tomak. Osan ne’e mak aloka hanesan millaun $2,5 kada tinan durante períodu tinan 12. Objetivu husi investimentu ida ne’e ba produtividade mak atu fornese materiál planta (Kafé oan) no insumu agríkola sira ba reabilitasaun ho médiu ektare 2.500 to’os Kafé kada tinan.

Implementasaun ba planu ne’e sei superviziona husi grupu traballu ne’ebé prezide hosi MAP, Asosiasaun Kafé Timor-Leste, grupu interesada hosi Kafé sira no grupu suportivu mak hanesan Governu, parte interesada husi infraestrutura, turizmu, Organizasaun Naun Governamentál, organizasaun kolaboradora sira.

Ministru Agrikultura no Peska, Joaquim José Gusmão dos Reis Martins, hatete, Kafé agora nia produsaun tun, tanba ne’e mak kria planu ne’ebé di’ak no bainhira halo tuir ida ne’e espetativa mak to’o iha 2030 bele halo dupla produsaun.

“Hanesan ha’u dehan hakerek de’it ita bele, maibé implementasaun ne’e mak importante hodi nune’e ita bele implementa tuir saida mak ita hakerek ona iha planu ne’e para to’o iha 2030 ita sei bele halo dupla produsaun”.

Kona-ba orsamentu MAP iha montante ne’ebé ki’ik, maibé tenta atu tau liu orsamentu di’ak ba setór Kafé iha tinan oin.

“Espesiál liu tanba iha 20 maiu ita-nia Na’i-Prezidente tau loos importánsia boot ba iha setór Kafé nian, tanba ne’e maka iha 2020 ne’e ita sei halo planu di’ak bazeia ba planu ne’e, ita tau orsamentu adekuadu para ita bele dezenvolve di’ak liután ita-nia setór Kafé,” hateten Ministru Joaquim José Gusmão dos Reis Martins.

Jornalista      : Maria Auxiliadora

Editór             : Francisco Simões

HAKEREK NO HATÁN

Please enter your comment!
Please enter your name here