Komandante Interinu Komandu Polísia Munisípiu Dili, Superintendente Asistente Polísia, Euclides Belo

DILI, 28 maiu 2019 (TATOLI)Tuir informasaun ne’ebé Polísia Nasionál Timor-Leste (PNTL) rekolla katak autór sira ne’ebé baku ema no taa ema iha Zita Plaza, Comoro, iha segunda horsehik, tanba la satifas ho sira nia kolega ne’ebé mate iha Postu Administrativu Vemasse, Bucau, foin lalais ne’e.

Komandante Interinu Komandu Polísia Munisípiu Dili, Superintendente Asistente Polísia, Euclides Belo haktuir kronolojia hosi kazu ne’e katak akontesementu ne’e mosu bainhira grupu balun akompaña mate isin vítima Filomeno da Costa Maia Gusmão (28) ne’ebé mate iha konfrontu grupu eis arte marsiál iha Kaikua, Postu Administrativu Vemasse, iha sábadu (25/05) lokraik oras tuku 15:00.

Nia dehan, mate isin lori ba Hospital Nacional Guido Valadares (HNGV), Toko Baru, Dili, no segunda horsehik halo hotu ona autopsia, depois atu lori mate isin ba matebian ba uma iha Comoro, to’o dalan klaran área Aimutin, derepente autór balun halo asaltu baku no taa kanek joven ida ne’ebé hala’o hela atividade fa’an pulsa inklui harahun motór haat.

Euclides informa, família vítima ne’ebé kanek inklui vitima husi motór haat hato’o ona keixa ba polísia no polísia sei hein mandadu kapturasaun hosi Ministériu Públiku.

“Ami indentifika oan autór sira husi vídio ne’e hodi hein karta hosi Ministériu Publiku sai para depois polísia sei halo kapturasaun ba pesoál sira ne’e,” tenik Euclides ba jornalista iha Komandu Polísia Munisipiu Dili, Caicoli, Dili, ohin.

Nia hatutan, pesoál sira ne’e PNTL indentifika sira nia hela fatin iha área Comoro no tempu besik sei kaptura hotu no PNTL sei la fó fatin ba kualkér ema sé de’it atu halo krime baku ka oho ema.

Euclides dehan, polísia kontinua koordena no rekolla hela informasaun hosi vítima ne’ebé hala’o hela tratamentu iha HNGV. “Ami komunika hela ho vítima para buka tuir autór no madre sira mós fó hela informasaun ba polísia. Sedu ka tarde ita sei deskobre suspeitu ne’e,” nia hateten.

Komandante ne’e haklaken, ema hotu hakarak Dili sai furak, Dili seguru no Dili sai fatin investimentu ba ema hotu-hotu no Dili sai fatin pás hodi kontribui ba dezenvolvimentu.

Oras  ne’e, PNTL Dili koloka ona membru  400 asegura seguransa iha postu adminstrativu neen hanesan Ataóro, Kristu Rei, Don Aleixo, Metinaro, Nain Feto no Vera Kruz.

 Jornalista: Eugénio Pereira

Editór: Xisto Freitas

 

Lee mós notísia tuir mai…

Kazu Vemasse no Zita Plaza, Polísia Kaptura Autór Ualu

HAKEREK NO HATÁN

Please enter your comment!
Please enter your name here