Xefe Departamentu Desportu Komunitária SEJD, João Lemos

DILI, 28 maiu 2019 (TATOLI)—Sekretaria Estadu Juventude no Desportu (SEJD), hein hela karta hosi Komité Paralímpiku Nasionál Timor-Leste (CPNTL-sigla portugés), hafoin prosesa subsídiu ba atleta Teófilo Feitas.

“Kona-ba alteta Teófilo nia subsídiu ne’e, ha’u ba ko’alia ona ho parte administrasaun CPNTL nian. Tuir lei ne’e, tinan ida nia manán, depois tinan oin ita prosesa nia subsídiu. Agora hein de’it karta hosi CPNTL no bainhira karta to’o ami-nia liman SEJD bele prosesa ona subsídiu ba atleta Teófilo,” Xefe Departamentu Desportu Komunitária hosi SEJD, João Lemos, ko’alia ba Tatoli iha nia kna’ar fatin, Lecidere, tersa ne’e.

Nia fó ezemplu, atleta Teófilo Freitas hetan medalla osan-mean iha tinan 2018, entaun subsísiu ne’e prosesa iha tinan 2019.

“Agora prosesu la’o dadaun ona. Kona-ba orsamentu ha’u seidauk serteja ba ida ne’e, tanba ne’e kabe ba kompeténsia Komisaun Nasionál Desportu nian. Ha’u-nia serbisu oinsá mak atu fasilita de’it,” nia katak.

Xefe Departamentu ne’e ko’alia ona ho parte CPNTL iha kona-ba asuntu ne’e iha segunda (27/5/2019) liu-ba.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here