Prezu nia liman. Imajen/google

DILI, 28 maiu 2019 (TATOLI)-Atu bele eleva koñesimentu no abilidade dadur sira nian maka Servisu Prizaun Becora, kontinua oferese formasaun iha área lingua inglés, portugés, kustura, pedreiru no karpinteiru ba dadur sira.

Diretór Distritál Estabelesimentu Prizaun Becora, João Domingos, relata katak, dadur besik atus rua resin maka tuir hela formasaun iha área hirak ne’e. kompostu hosi, na’in 25 tuir formasaun ingles, portugés (54), kursu alfabetizasaun (60) no formasaun vokasionál hanesan karpintaria, pedreiru no kustura mós lao hela.

Alende formasaun hirak ne’e, iha mós formasaun espirituál ba  dadur sira  ne’ebé oferese hosi Padre no madre sira, enkuantu ba dadur musulmanu sira mós hetan formasaun hanesan hosi Ustad no Haji.

“Formasaun sira ne’e atu transforma mentalidade no atitude dadur sira nian molok fila hikas ba hamutuk ho sosiedade no família,”  hateten João Domingos.

Kolokasaun formasaun ne’e hala’o bazeia ba kapasidade dadur sira iha area ida-idak  hodi nune’e sira bele iha aproveitamentu di’ak durante formasaun ne’e lao. Entretantu, total dadur ne’ebé rejista iha Prizaun Becora to’o ohin hamutuk  na’in 615, kondenadu 449, preventiva 166.

Krime droga na’in hitu, timoroan na’in tolu no estranjeiru na’in haat, Dadur joven hamutuk 61, kompostu hosi Kondenadu 38, preventiva 22  no medida seguransa na’in ida.

Dadur sidadaun estranjeiru  na’in 31, kompostu hosi sidadaun indonézia  na’in 22, Filipina 4, Xina 4, no Australia ida. Eis membru  PNTL na’in rua no eis membru  FALINTIL- Forsa Defeza Timor-Leste feto na’in rua.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here