Prezidente Komisaun B Parlamentu Nasionál, Cornelio Gama L7. Imajen/António Goncalves

DILI, 28 maiu 2019 (TATOLI)– Sidadaun hotu, tantu ema boot ka ki’ik, joven ka katuas, feto ka mane, xefe suku ka autoridade lokál sira, veteranu ka veterana, hothotu tenke kontribui informasaun ba parte seguransa hanesan Polisia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL) bainhira rona ema ruma hakarak provoka estabilidade.

“Ami husu ba ema hotu atu kontribui informasaun ba parte polisia kuandu ema tenta atu halo violénsia ka krime ruma iha sosiedade nia laran,”  alerta Vise Prezidente Komisaun B ne’ebé trata asuntu Seguransa no Defeza Parlamentu Nasionál, Cornelio Gama L7, ba Ajénsia TATOLI, ohin, iha sala komisaun B.

L7 hatutan, maske polisia iha fatin hotu maibé povu tenke servisu hamutuk ho parte seguransa, nune’e servisu bele di’ak liután bainhira ema hakarak tenta kria instabilidade iha rai laran.

Akontesimentu sira durante ne’e halo públiku pániku no trauma, maka oho malu iha fatin-fatin, baku malu, hana malu, ne’ebé envolve  joven sira.

“Joven sira dehan sira maka futuru nasaun, maibé sira estraga fali sira nia futuru, nune’e maka tenke evita problema atu kontribui ba pas iha rai laran,” hateten L7.

Situasaun konfrontu sira ne’ebé mosu iha sosiedade nia laran, Komisaun B sei bolu parte Komandante Jerál PNTL ho Ministru Defeza no Seguransa, atu bele fó informasaun mai komisaun kona-ba motivu saida maka ema oho malu nafatin, hana malu la para, baku malu iha fatin-fatin.

Jornalista       : Zezito Silva

Editór             : Francisco Simões

HAKEREK NO HATÁN

Please enter your comment!
Please enter your name here