Komandante Jerál PNTL, Komisáriu Faustinho da Costa no Segundu Komandante, Komisáriu Mateus Fernandes, ko'alia ba jornalista sira hafoin enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité. foin lalais. Imajen António Gonçalves

DILI, 28 maiu 2019 (TATOLI)Komandu Polísia Nasionál Timor-Leste (PNTL) kaptura ona autór na’in ualu ne’ebé deskonfia involve iha kazu konfrontasaun entre oknum eis arte marsiál iha Kaikua, Postu Administrativu Vemasse, Munisipiu Baucau no kazu baku no taa kanek vítima joven ida iha Loja Zita Plaza, Aimutin, Comoro, Dili, hodi estraga mós motór haat.

Antes ne’e, grupu eis arte marsiál ataka malu iha Kaikua, rezulta vítima Filomeno da Costa Maia Gusmão (28) mate iha loron sábadu (25/05) tuku 15:00 Otl.

“Agora ema na’in ualu mak iha hela sela polísia. Ohin lokraik ida ne’e kedas aprezenta ba Ministériu Públiku ba primeiru interogatóriu hodi prosesa kazu ne’e ba oin,” informa Komandante Jéral PNTL, Komisáriu Faustinho da Costa ba jornalista hafoin aprezenta kazu konfrontu refere ba Primeiru Ministru, Taur Matan Ruak iha Palásiu Governu, Dili, ohin.

Komisáriu ne’e rekoñese konfrontu ne’ebé akontese rezulta vítima Filomeno mate hodi hada’et mai akontese iha Dili, maibé PNTL halo esforsu kaptura kedas autór sira ne’ebé deskonfia involve iha kazu sira ne’e.

Iha enkontru ne’e, Primeiru Ministru (PM), Taur Matan Ruak husu ba polísia kontinua hametin siguransa iha bairru sira ne’ebé risku ba konflitu no mantein halo siguransa maka’as.

Lori naran Komandu PNTL, nia apela ba oknum eis organizasaun arte marsiál sira labele uza naran arte marsiál hodi kontinua asalta malu hodi hakotu ema seluk nia vida.

Komandu PNTL aprezenta mós ba PM Taur kona-ba operasaun kojunta ne’ebé PNTL halo ho Provedoria Direitu Umanu no Justisa (PDHJ-sigla portugés), Komisaun Antí Korrupsaun (KAK) no FALINTIL-Forsa Defeza Timor-Leste (F-FDTL) hodi prende karreta Estadu ne’ebé halo viajen iha loron sábadu no domingu.

Jornalista: Eugénio Pereira   

Editór: Xisto Freitas

HAKEREK NO HATÁN

Please enter your comment!
Please enter your name here