Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 28 maiu 2019 (TATOLI)-Ministru Agrikultura no Peska, Joaquim José Gusmão dos Reis Martins, hatete, Kafé sai buat ida importante ba ema nia moris ohin loron. Maizumenus totál família hamutuk 1/3 (um tersu) iha nasaun mak kuda Kafé no porsentu 20 hosi totál umakain sira hotu mak depende ba Kafé hodi hetan rendimentu, maibé família barak ne’ebé prodús Kafé sei enfrenta inseguransa alimentár no luta hodi hetan ai-han sufisiente tanba produtividade menus no presu menus no volátil.

“Ita bele hasai produtór Kafé hosi ki’ak liuhosi modernizasaun ita-nia setór Kafé. Hasa’e produsaun no hadi’ak kualidade sei kria servisu foun no aumenta rendimentu família iha área produsaun Kafé tradisionál. Iha mós poténsia atu espande produsaun Kafé ba área foun,” hateten Ministru  Joaquim José Gusmão dos Reis Martins, ohin, iha lansamentu Planu Nasionál ba Dezenvolvimentu Setór Kafé (PNDSK) iha Otél Timór.

Ministru Joaquim dehan, Kafé la’ós produtu foun iha Timor-Leste. Esforsu barak tebes halo ona hodi hametin setór ne’e, iha parseiru dezenvolvimentu barak ne’ebé fó apoiu ba setór Kafé, maibé esforsu hirak ne’e seidauk koordena ho di’ak no nia nivel jerál ba investimentu sei menus liu husi nesesidade atu moderniza setór ne’e.

“Governu deside ona atu prepara planu ida ba setór Kafé, nune’e bele aselera modernizasaun ba setór ne’e. Planu nasionál ne’e nu’udar primeira vés ba setór Kafé. Planu ne’e komprensivu, ambisiozu ida ba longu prazu,” hateten Ministru Joaquim.

Nia subliña tan, Governu sei investe hodi habarak treinamentu no apoia ba agrikultór Kafé no ida ne’e importante duni ba melloramentu produtividade no hasa’e to’os-na’in sira-nia rendimentu.

Nia hatutan, Governu nia estensionista sira sei fó tulun hodi implementa programa iha planu nasionál ne’e no sei dezenvolve mekanizmu atu parseria ho setór privadu.

Iha fatin hanesan, Diretór Nasionál Kafé no Plantasaun Indústria Ministériu Agrikultura no Peska (MAP), Fernando Santana, esplika, ko’alia sobre Timor-Leste ohin loron katak iha setór Kafé halo produsaun menus liu husi poténsia ba longu prazu.

“Pobreza no má nutrisaun persistente no reseita esportasaun menus. Kauza sira mak produsaun menus no volátil. Kualidade inkonsistente no menus ba nia potensialidade, jestaun no koordenasaun sira iha setór fraku”.

Hosi produsaun menus no volátil ne’e kauza hosi nivel inkluzaun finanseiru menus entre to’os-na’in sira, peskiza aplikada uitoan de’it, inseguransa kona-ba pose ka na’in ba rai, impaktu aumenta husi mudansa klimátika ne’ebé sa’e ba daudaun, estrada no infraestrutura suportiva ho kualidade ladi’ak, nivel adosaun prátika agrikultura di’ak sei menus, sistema estensionista setór públiku sei fraku, partisipasaun juventude nian ne’ebé tun bá beibeik no partisipasaun menus husi feto sira iha formasaun.

Atubele hasa’e produsaun Kafé maka Ministériu Agrikultura no Peska ne’ebé hetan apoiu hosi Banku Dezenvolvimentu Aziátiku (ADB-siglaingles) no Asosiasaun Kafé Timor-Leste lansa ona Planu Nasionál ba Dezenvolvimentu Kafé ne’ebé ho espetativa atu hadi’a produtividade, kualidade no asesu ba produsaun Kafé iha Timor-Leste ba merkadu mundiál.

“Ita sei uza planu nasionál setór Kafé Timor-Leste atu hasai produtór Kafé sira husi ki’ak liuhusi dezenvolvimentu ita-nia setór Kafé hodi kria serbisu no hasa’e rendimentu husi família sira ne’ebé kuda Kafé”.

Kafé nu’udar planta istóriku no importante tebes ba Timor-Leste. Kuaze um tersu hosi umakain sira iha nasaun mak kuda Kafé no porsentu 20 mak depende liu ba Kafé hodi hetan osan.

Jornalista      : Maria Auxiliadora

Editór            : Francisco Simões

HAKEREK NO HATÁN

Please enter your comment!
Please enter your name here