Espoza Prezidente Republika Cidalia Nobre Guterres, Tersa (28/5/2019), vizita dadur sira iha Prizaun Becora. Imajen/Egas Cristovão

DILI, 28 maiu 2019 (TATOLI)-Espoza Prezidente Repúblika,  Cidália Nobre Guterres, husu ba dadur sira iha Prizaun Becora, atu halo reflesaun no hadi’a atitude no hahalok la di’ak iha tempu pasadu hodi sai ema foun antes fila hikas ba sosiedade no família nia leet.

Cidália Nobre Guterres hato’o lia hirak ne’e, ohin, bainhira halo vizita ba Prizaun Becora, hodi haree situasaun no kondisaun prezu sira nian.

“Fatin ida  komarka  la’ós atu sulan de’it, maibé fatin atu halo reflesaun no reinsersaun sosiál  hodi hadi’a hahalok  ruma maka durante ne’e naksalak,” afirma Cidália Nobre Guterres, hodi husu mós ba dadur sira atu hadi’a mentalidade umana ida di’ak liu  atu labele repete tan krime ba dala rua hodi okupa nafatin prizaun iha futuru.

Ho esperiénsia moris ne’ebé prezu sira hetan iha prizaun, Cidália  espera, sei sai ezemplu atu hakribit violénsia hodi kuda domin no unidade  iha família no sosiedade.

“Balun ne’ebé atu sai labele repete tan krime hodi fila fali  mai prizaun iha futuru,” afirma Cidália Nobre Guterres.

Nia apela ba dadur sira atu hametin unidade no kuda domin iha ida –idak  nia fuan  hodi apoiu malu durante hela iha prizaun, tanba timoroan ema ida de’it.

Iha tempu hanesan, Gabinete Espoza Prezidente Repúblika  ho ekipa fahe mós roupa ne’ebé suporta hosi Kompañia ConocoPhillips ba dadur sira ho sentidu solidariedade no domin nu’udar Timoroan.

“Apoiu ne’e nu’udár sinál domin ninian, la’ós tanba sasán maibé domin ne’e nu’udar timoroan,” tenik Cidália Nobre Guterres.

Iha biban hanesan, Diretór Nasional Servisu Prizaun no Reinsersaun Sosiál,  Helder Cosme Marcal Belo, husu ba sosiedade timor leste atu respeita diretu dadur sira liuliu, la bele  diskrimina dadur sira bainhira livre ona hodi fila ba sosiedade nia leet.

“Tuir dadus ne’ebé sira hato’o foin sai hosi odamatan prizaun ba to’o estrada boot mosu ona liafuan la edukativu, ida ne’e dezafiu ida iha sosiedade nia leet atu apoiu  hodi  halo prevensaun ba krime iha timor,” tenik Helder Belo.

Durante vizita iha Prizaun Becora, Espoza Prezidente Repúblika ho ekipa halo mós reflesaun  espirituál ne’ebé dirije hosi Prezidente ezekutivu Conselho Nacional da Juventude de Timor-Leste (CNJCTL) Pe. João Soares  ho ekipa ba dadur sira kona-ba lala’ok moris iha pasadu no esperansa moris ba futuru atu sai ema di’ak.

Iha marsu 2019, ekipa  halo  mós vizita hanesan ba   dadur sira iha Prizaun  Gleno, Munisípiu Ermera,  hodi fahe apoiu no halo reflesaun hanesan.

Tuir lista dadur iha Prizaun Becora to’o ohin  rejista prezu hamutuk  ema na’in 615, kompostu hosi prezu kondenadu  na’in 449 no  prezu preventiva na’in 166.

Krime droga na’in 7 kompostu hosi Timoroan 3 no estranjeiru 4, dadur joven hamutuk 61 kompostu hosi prezu  kondenadu 38, preventiva 22 no medidas seguransa na’in ida.

Sidadaun estranjeiru hamutuk  na’in 31, kompostu hosi sidadaun indonézia 22, Filipina 4, Xina 4 no Australia na’in ida.

Iha mós eis membru Polisia Nasional Timor-Leste na’in rua no eis membru FALINTIL- Forsa Defeza Timor-Leste feto na’in rua.

Vizita Espoza Prezidente Repúblika nian iha Prizaun Becora, akompaña mós hosi espoza Ministru Justisa, Manuel Cárceres da Costa, espoza Komandante PNTL, Komisáriu Faustino da Costa no espoza hosi ofisial F-FDTL no PNTL seluk tan.

Jornalista     : Agapito dos Santos

Editór           : Francisco Simões

HAKEREK NO HATÁN

Please enter your comment!
Please enter your name here