Dadur sira iha Prizaun Becora. Imajen/dok.espesiál

DILI, 28 maiu 2019 (TATOLI)-Maske  moris iha prizaun laran, maibé sira mós iha domin hodi salva ema seluk nia vida.  Tuir estatístika servisu Prizaun rejista katak,  dadur 200-resin maka oferese ona ran liuhosi programa doasaun ba Ospitál Nasionál Guido Valadares (HNVG-sigla portugés) durante tinan kotuk to’o meadu maiu ne’e.

“Tuir oráriu annual, tinan ida ami halo doasaun ran dala rua hodi komemora loron restaurasaun independénsia 20 maiu, no mós loron proklamasaun independénsia, 28 Novembru, loron rua ne’e ami selebra ho atividade no doasaun ran,” informa Diretór Distritál Estabelesimentu Prizaun Becora, João Domingos, ohin,  ba jornalista sira iha Prizaun  Becora, Dili.

Dadur hirak ne’ebé fó ona doasaun ran ba HNGV, mak hanesan iha iha 28 novembru 2018, dadur  hamutuk 97 no dadur 107 maka oferese iha 20 maiu 2019.

“Asaun doasaun ran ne’e atu rekoopera sira ninia komportamentu mezmu mai ho atitude violentu maibé oferese ran ne’e atu salva ema vida,” tenik João Domingos.

Iha oportunidade, Espoza Prezidente Repúblika, Cidália Nobre Guterres, apresia ho doasaun ran ne’ebé oferese hosi dadur sira tanba ho ran turuk ida salva ona ema nia vida.

“Apoiu ran hosi dadur sira mós apoiu hodi salva ema ida nia vida  tanba ran turuk ida bele salva ema nia vida no moris,” tenik Cidália Nobre Guterres.

Jornalista      : Agapito dos Santos

Editór             : Francisco Simões

 

HAKEREK NO HATÁN

Please enter your comment!
Please enter your name here