Diretór Isílio Coelho. FOTO: MNEK

DILI, 28 maiu 2019 (TATOLI) – Diretór Jerál Asuntu Bilaterál, Ministériu Negósiu Estranjeiru no Kooperasaun (MNEK), Isílio Coelho informa katak dezde 2002 selebrasaun akordu internasionál ne’ebé Timor-Leste realiza la iha giaun únika atu orienta kona-ba prosesu atu asina akordu tanba ne’e MNEK la iha koñesimentu kona-ba akordu sira balun ne’ebé ministériu sira halo, antes ne’e.

“Akordu ne’ebé asina sein koñesimentu husi Ministériu Negósiu Estranjeiru no Kooperasaun ne’e akontese antes de 2010,” informa Diretór Jerál Isílio Coelho ba Ajénsia TATOLI, iha nia kna’ar fatin, edifísiu MNEK, Praia dos Coqueiros, tersa (28/05).

Diretór ne’e informa mós katak lei kona-ba kestaun internasionál ne’e foin mosu iha 2010. Lei númeru 6 maiu 2010 ne’e hateten katak prosesu atu asina akordu sira ne’e bazeia ba lei Timór nian.

Depois iha lei ne’e mós fahe kedas, akordu hotu MNEK hamutuk ho defeza no seguransa no Prezidente Repúblika maka koordena no ko’alia mós kona-ba atu asina oinsá no nia prosedúr interna ne’e hanusá.

“Husi ne’e maka foin fó guia klaru ida ba ita oinsá atu organiza selebrasaun akordu ida ne’e,” hateten diretór.

Diretór Isílio Coelho konsidera katak akordu ne’ebé Timor-Leste asina maibé barak mós MNEK la iha koñesimentu tanba iha diskordenasaun uitoan ne’ebé akontese, halai liubá antes ne’e (2010); seidauk iha giaun ida klaru nune’e ministériu sira balun asina nota entendimentu ruma la iha rekoñesimentu ruma husi MNEK. “Nune’e apezarde agora lei orgánika governu nian no MNEK, diresaun asuntu jurídiku MNEK ne’e mak depozitáriu ba akordu hotu ne’ebé Timór asina”.

“Tuir loloos ne’e, antes lori proposta ba Konsellu-Ministru tenkesér hetan uluk paresér jurídiku MNEK pois maka lori ba asina, no nia orijinál tenke mai fila fali MNEK hodi depozita iha departamentu asuntu jurídiku MNEK nian no liña ministeriál sira lori nia kopia maka hodi bele halo implementasaun,” nia esplika.

Diretór Isílio Coelho haktuir katak nia parte iha MNEK durante tinan haat ona, maske nune’e iha akordu ida ka rua mak ministériu sira asina sein koñesimentu MNEK nian; númeru ki’ik tebes.

Tanba ne’e, tuir nia, importante ita halo tuir buat ne’ebé mak lei prevee ona para bele fasilita implementasaun husi akordu sira ne’e. “Se la iha koordenasaun, implementasaun difisil uitoan. Tanba implementasaun, hakarak ka lakohi MNEK tenke tama iha laran,” konsidera diretór ne’e.

Iha biban hanesan, Diretór Jerál Asuntu Bilaterál MNEK, Isílio Coelho akresenta katak asina akordu sira, importante liu iha enkontru nivel interministeriál iha nivel tékniku, sempre diskute kona-ba prosesu rua ne’ebé mak hala’o sobre akordu internasionál, ne’ebé nia inisiativa, ida; mai husi Timor-Leste no seluk husi nasaun parseria.

Se inisiativa ne’e mai husi Timór, husi ministériu ruma atu halo akordu bilaterál ho nasaun seluk, ministériu refere presiza halo konsulta ho MNEK nune’e MNEK bele analiza no estuda kona-ba akordu ne’ebé atu asina, hafoin halo koordenasaun ho embaixada hodi haree, bele ka labele hodi la’o tuir lei ne’ebé iha, tanba MNEK maka sai hanesan portavós ka odamatan boot hodi tama sai.

Akordu Ho Parseria Hamutuk 348

Diretór Jerál Asuntu Bilaterál MNEK, Isílio Coelho klarifika katak akordu ne’ebé Timor-Leste asina ho nasaun parseria sira hamutuk 348, kompostu husi akordu kuadru kooperasaun, memorandum, protokolu no seluk tan. “Ita mós foka liu ba akordu ne’ebé ita asina depois de restaurasaun independente, númeru ne’e maka ita iha no asina hahú husi tinan ida ne’ebá to’o tinan ida ne’e”.

Nia akresenta, akordu ladún simples atu komprende tanba iha modalidade ida ita asina uluk hanesan kuadru kooperasaun, pois bazeia ba akordu kuadru kooperasaun ne’e maka ita asina fali nota entendimentu, protokolu kooperasaun ba implementasaun projetu programa espesífiku, setoriál; agrikultura ba agrikultura, peska ba peska, edukasaun, saúde no seluk tan.

Aleinde ne’e iha modalidade ida ita la asina akordu kooperasaun maibé ita asina direita memorandu, protokolu kooperasaun espesífika. “Ha’u sente ita foka ba rai haat ne’ebé ita asina akordu barak liu. Porezemplu ho Indonézia, agora ita asina ona akordu ho totál 70, tuir mai Portugal totál 46 akordu, Xina 35 no Japaun 32 akordu,” relata diretór ne’e.

Diretór ne’e konsidera, implementasaun ba akordu hanesan dezafiu boot uitoan, maske em termos de implementasaun prosesu la’o di’ak hela.

“Ezemplu, hanesan rai balun; Indonézia, Japaun, Portugal, Xina em termos de implementasaun ha’u sente maioria ita hala’o hela, karik ida rua maka nia implementasaun ne’e la’o ladún tuir buat ne’ebé ita hakarak”.

“Tanba prosesu la’o di’ak, nune’e fulan oin Ministru Negósiu Estranjeiru no Kooperasaun Dionísio Babo Soares sei ba Portugal ba tuir enkontru interministeriál liña CPLP atu aproveita asina fila fali tan akordu kooperasaun ba 2018 to’o 2022 kona-ba área ne’ebé ita koopera hela, tanba ne’e em termos de implementasaun, ba ita-nia parseiru sira ne’ebé iha kooperasaun substánsia konkreta ne’e la’o di’ak hela”.

Diretór Jerál Asuntu Bilaterál MNEK, Isílio Coelho haktuir mós katak iha akordu ne’ebé nia implementasaun la la’o di’ak ho nasaun parseria balun hanesan Angola iha 2002, Cabo Verde, Kambodia iha 2006 no Kuwait, ne’ebé falla envolvimentu MNEK para halo nia papél iha prosesu.

Fallansu sira ne’e akontese tanba parte téknika; primeiru koordenasaun, kapasidade resposta husi instituisaun ne’ebé envolve, ita-nia kapasidade atu lee no analiza testu ne’ebé parseiru sira haruka mai, aproximasaun entre ministériu relevante sira, nune’e mós koordenasaun no submisaun ne’e maka dalaruma halo prosesu ne’e naruk.

“Husi kazu konkretu ida ne’e, karik ho situasaun polítika (impase) iha tinan hirak liu ba maka la ajuda ami atu prosesa buat sira ne’e hotu, tanba governu balu tinan rua ho balu no balu tinan hitu, tanba ne’e teknikamente iha fallansu,” nia rekoñese.

Hadi’a Fallansu

Ho problema ne’ebé MNEK enfrenta iha aspetu kooperasaun, MNEK iha planu atu hadi’a fila fali fallansu ne’ebé mak iha.

“Ha’u sente planu iha hela, iha mós background ba lei, foka maka’as ba parte ida ne’e hotu, iha orientasaun para ami hadi’a lais buat sira ne’e, mas ha’u sente fila ba fali rekursu umanu. MNEK iha parte bilaterál, ami fahe tiha ami-nia relasaun bilaterál ne’e tuir rejiaun jeográfika, ne’ebé pontu fokál ida kaer rai lima ou liu nune’e ami iha mós situasaun ida akontese ho frekuénsia bolu rotasaun”.

“Kolokadu rotasaun no sistema arkivu ladi’ak husi pontu vokál ida pasa fali ba pontu vokál ida dalaruma la komprende tenke estuda fali husi zero entaun lori tempu, ida ne’e mós falla hotu. Maibé, ami esforsu atu halo diseminasaun ba lei, se ita hotu hatene ona lei ida ne’e, ita sei rezolve fallansu ne’ebé iha to’o agora”.

Diretór ne’e mós haktuir, akordu hotu ne’ebé asina iha artigu ida hateten katak parte ida husi akordu, hakarak atu renova ka kansela bele halo, nune’e kazu ne’ebé la konkorda bele kansela ka negósia.

“Ha’u haree husi konteúdu sira uluk, ita asina ne’e la kompromete Timór ba buat ne’ebé la di’ak. Ha’u hanoin to’o agora governu ne’ebé maka mai kontinua de’it kompromisu sira ne’ebé maka governu anteriór asume tiha ona no tuir koñesimentu ne’ebé ha’u iha to’o agora ha’u seidauk iha desizaun atu kansela akordu ou renova akordu tanba la konkorda nia konteúdu”.

Iha fatin hanesan, Diretór Isílio Coelho informa mós kona-ba prosesu husi rezultadu fronteira terrestre ne’ebé mak hala’o entre Indonézia ho Timor-Leste, iha ona rezolusaun governu ida iha tinan kotuk.

Nia haktuir, uluk prosesu negosiasaun ne’e iha MNEK nia portafóliu maibé agora iha ona gabinete ida toma konta loos de’it ba kestaun fronteirisa.

Inisialmente, fronteira marítima sei fó rezolusaun ba governu halo revizaun ida inklui mós fronteira terrestre. Nune’e, prosesu kona-ba fronteira terrestre entre Timor-Leste ho Indonézia, MNEK pasa hotu ona fali ba Gabinete Fronteira Marítima (GFM). Tanba ne’e, negosiasaun ne’e kompeténsia GFM nian.

“MNEK apoiu de’it iha liña de komunikasaun entre Timor-Leste ho nasaun  viziñu Indonézia ne’ebé negosia hela kona-ba prosesu ida nee,” dehan Diretór Jerál Asuntu Bilaterál MNEK, Isílio Coelho.

Lee mós notísia: http://www.tatoli.tl/2019/02/izensaun-taxa-aplika-mos-ba-parseiru-bilateral-hotu/

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here