DILI, 28 maiu 2019 (TATOLI)—Hanesan fitun ne’ebé lakon naroman iha lalehan, FC Fitun Estudante Lorosa’e (FIEL) lakon nia naroman no sei lakan hikas iha tinan oin. Adeus! Hasoru malu fali iha tinan oin.
Mehi aat. Tornado ho nia kbiit satan FIEL nia hakat. Hakat ba oin ladi’ak. Halo nia tenke hakiduk. Hanesan tornado, Boavista Timor FC ho nia kbiit jogu ne’ebé iha impede FIEL atu hadau mehi ida—mehi atu lori Tasa 12 Novembru 2019.
Mehi atu sai manán na’in ba Tasa 12 Novembru la konsege realiza tanba Boavista Timor FC hasees FIEL ho rezultadu 2-0 liuhusi jogu ho sistema bota fora (sistem gugur-termu Indonézia) ne’ebé hala’o iha Kampu Demokrasia, Dili, tuku 16:00 ohin.
Maski bele lakon maibé FIEL fó satisfasaun ba nia adeptu sira. Katak, FIEL la’ós hasoru klube baibain. Nia hasoru klube boot. Klube ne’ebé hola parte iha Primeira Divizaun Liga Futeból Amadora (LFA) époka 2019. Klube ne’ebé ho nia jogadór mesak iha esperiénsia joga iha rai laran no rai li’ur.
Iha jogu nia hahú, jogu primeira parte, ekipa rua hatudu sira nia tékniku jogu ne’ebé furak. Joga ho arte. Hadau malu bola hanesan ema halo ezersísiu jumba. Halo adeptu sira la baruk atu asiste jogu. Asiste ho orgullu maski hamriik iha loron manas nia okos.
Jogu hahú manas dadaun. Guarda rede hosi ekipa rua tarutu la oras. Han pankada bola. Bola mai hosi xutu be nab-naban hosi jogadór ekipa rua. Maibé, xutu hirak ne’e, la kona iha alvu. La fó rezultadu ne’ebé di’ak. La golu.
Luta kontinua la’o. Ekipa rua iha ambisaun atu bele hatama golu. Esforsu hirak ne’e, ikus atribui rezultadu pozitivu ba Boavista Timor FC. Iha minutu 21, jogadór avansadu Danilson Araújo (11), fura no lees rede Fitun Estudante Lorosa’e liuhusi bola xutu kantu ne’ebé atribui hosi defeza Nélson Viegas (22) hosi parte sikun (kantu) eskerda.
Bele han ona golu ida (1) maibé FIEL kontinua fiel (setia-termu Indonézia) ba nia prinsípiu. La dezesperadu. Sira kontinua iha vontade ne’ebé kahur malu ho ambisaun hakarak responde golu ida hodi muda rezultadu sai balansu maibé imposível. Xutu hirak ne’ebé avansadu FIEL lansa, sempre salva hosi defeza Boavista.
Hela minutu 4 atu jogu primeira parte terminadu, ekipa FIEL hanoin golu to’o de’it iha ne’e. Hanoin Boavista la hatama tan golu ruma. Tanba ne’e, defeza direita hosi FIEL, Teodosio Belo (2) lakohi sériu kontrola bola. Husik adversáriu book-án ho livre iha grandeia. Adversáriu la nonók. Sira aproveita kedas momentu. Sira okupa fatin mamuk ne’ebé Teodosio la kontrola hodi hatama kedas golu. Mate ka lae. Golu atribui hosi defeza Boavista, Nélson Viegas iha minutu 40. Nia lansa xutu ho velosidade maka’as halo guarda rede tuda-án atu kaer bola maibé la toman. Gooooolu! Rezultadu muda-án imediata ba 2-0 no rezultadu ida ne’e determina Boavista nia vitória. Parabéns.
Tama ba iha segunda parte, la’ós golu mak nab-naban maibé kartaun mak nab-naban fali. Tensaun jogadór nian alta. Tanba ne’e, jogadór la’ós joga bola maibé joga malu fali iha kampu laran. Nataniel Reis (8) hosi Boavista, simu kartaun kinur iha minutu 53 tanba halo erru natón iha kampu laran hasoru médiu FIEL, Carlos Soares (7). La’ós ne’e de’it. Rafael Marti (9) hosi Boavista, obrigadu tenke simu kartaun mean iha minutu 60 tanba tolok árbitru, relasiona ho desizaun ne’ebé foti hasoru nia amigu António Alcantara (87) ne’ebé hetan tebe hosi defeza FIEL, António Gomes (28).
Jogadór kontinua komete erru ba beibeik. Iha minutu 60, Gaudêncio Monteiro ne’ebé ho naran estimadu ‘Papua’ komete erru nune’e tenke simu kartaun kinur hosi árbitru. To’o jogu nia rohan no ninin, laiha jogadór ruma hosi FIEL mak hetan kartaun mean no kinur. Jogu ramata ona. Lori FIEL tenke ba deskansa. Elimanadu hosi Tasa 12 Novembru 2019.
Dirijente ba jogu ohin mak Nívio Fernandes, juiz ba liña Jeronimo Henrique, Cristovão da Silva no árbitru rezerva mak Salvador Cabral.
Treinadór FIEL, Arcenio Afonso hateten, sira sente kontente maski lakon tanba ekipa Boavista la’ós ekipa ne’ebé fásil ba klube segunda divizaun sira atu manán.
“Jogu ohin ne’e Boavista sente fásil maibé ba ami la’ós fásil. Maibé, ha’u kontente tanba ekipa kampiaun Liga ida mak joga ho ami hatama de’it golu rua. Kona-ba esperiénsia, sira maka’as maibé jogu ohin hanesan hela. Ami nia foku ne’e ba Liga. Fiar katak iha Liga ami sei hatudu jogu ne’ebé di’ak,” dehan Arcenio.
Iha sorin seluk, treinadór Boavista Timor FC, Fabiano José konfesa katak nia parte sente orgullu ba vitória ne’e maibé nia kontinua fó sala árbitru tanba konsidera árbitru foti desizaun la sériu.
“Jogu ohin di’ak maibé árbitru mak halo jogu la furak tiha. Foti desizaun la sériu liu. Maibé, prontu, jogu mak hanesan ne’e ona. Ba oin, ami sei hadi’a di’ak liu-tan ami-nia jogu atu hasoru ekipa seluk tuir mai,” tenik Fabiano.
Jornalista: Mídia LFA
Editór: Xisto Freitas