Governu Timór-Leste (TL) liuhosi Ministériu Saúde (MS) ho Governu Xina extende tan akordu nota entendimentu hodi apoia Médiku Xina hamutuk 11 iha Ospitál Nasionál Guido Valadares (ONGV). Imajen Antónia Gusmão

DILI, 27 maiu 2019 (TATOLI) – Governu Timór-Leste (TL) liuhosi Ministériu Saúde (MS) ho Governu Xina extende tan akordu nota entendimentu hodi apoia Médiku Xina hamutuk 11 iha Ospitál Nasionál Guido Valadares (ONGV).

Nota Entendimentu ne’e selebra iha salaun Ministériu Saúde, Governu TL reprezenta hosi Ministru Saúde Interinu, Bonifácio Maukoli dos Reis, no Governu Xina reprezenta hosi reprezentante Embaixada Xina iha TL, Lei Zhen.

Ministru Saúde Interinu, Bonifácio Maukoli dos Reis, hateten selebrasaun nota entendimentu ne’e marka tan istória ida ba Governu Timór-Leste.

Akordu ne’e rasik parte dahuluk asina ona iha 2004, no kada tinan rua renova dokumentu refere.

“Kooperasaun ida ne’e liga liu ba kontribuisaun hosi Governu Xina mai Timór-Leste liuliu iha parte saúde nian, ne’ebé apoia brigada médika Xina mai Timór, la’ós ne’e de’it maibé apoia mós ekipamentu no ambulánsia”, hateten Ministru ba jornalista sira hafoin asina nota entendimentu iha salaun MS, Kaikoli, ohin.

Bonifácio hatutan médika brigada Xina hamutuk 11; espesialista hosi departamentu oioin, hanesan sirurjia, kardiolojia no seluk tan.

“Ha’u haree durante ne’e sira servisu maka’as no di’ak tebes, ne’ebé ba oin nafatin halo kooperasaun, tanba ita foin ukun án ne’ebé presiza duni tulun hosi nasaun sira seluk, liuliu Governu Xina ne’ebé ajuda Governu Timór-Leste, maibé la’ós Xina de’it, mai mós hosi nasaun Austrália no seluk tan hodi ajuda saúde iha área sekundária”, afirma.

Governante ne’e haktuir médiku sira ne’e iha kapasidade boot atu fó atendimentu ba povu, maibé iha parte seluk, kuandu la aproveita sira nia matenek no ikus sai preokupasaun ba públiku katak médiku laiha.

Reprezentante Embaixadór Xina iha Timór-Leste, Lei Zhen, hateten objetivu apoiu ne’e ajuda tratamentu saúde ba povu Timór.

“Eventu asina akordu ne’e importante ba Governu Xina. Médiku Xina sira ne’e servisu iha Ospitál Nasionál Guido Valadares hodi halo tratamentu ba povu Timór-Leste”, katak Lei Zhen.

Lei Zhen argumenta aleinde fó tratamentu, reforsa kooperasaun iha área saúde no apoia Timór-Leste hodi hasa’e koñesimentu saúde di’ak ba povu Timór sai papél importante ba Governu Xina iha kooperasaun ne’e.

“Tinan 15 liu ba Governu Xina fó apoia ona ba dezenvolvimentu Timór iha área saúde no ba oin kontinua kooperasaun”, promete Lei Zhen.

Hafoin asina akordu, Governu Xina liuhosi ninia reprezentante ofisiálmente entrega médiku 11 ba Governu TL, no simu hosi Ministru Saúde Interinu akompaña mós hosi Diretór Jerál ONGV, Aniceto Cardoso Barreto.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here