Ekipa TIC kontinua instala aplikasaun sistema serbisu Governu Eletrónika ba liña ministeriál. Imajen espesiál

DILI, 27 maiu 2019 (TATOLI)Ajénsia Tecnologia da Informação e Comunicação (TIC) TIMOR I.P, kontinua hala’o instalasaun ba aplikasaun sistema serbisu Governu Eletrónika ba liña ministeriál no instituisaun Estadu.

Diretór Ezekutivu TIC, Roberto Caetano de Sousa Vicente dehan, agora dadaun progresu serbisu TIC kontinua avansa hodi instala sistema governu eletrónika hodi morderniza serbisu Governu la’o ho transparánsia no bele lori Governu hetan governasaun di’ak.

“Ha’u mai relata de’it progresu serbisu implementasaun governu eletrónika ne’ebé ami konsege instala ona ba liña ministeriál lubuk ida,” dehan Roberto ba jornalista hafoin ramata enkontru ho Primeiru-Ministru, Taur Matan Ruak, iha Palásiu Governu, Dili, ohin.

Nia esplika, liña ministeriál sira ne’ebé TIC konsege instala ona aplikasaun sistema Governu eletrónika hanesan kria link website ba Gabinete Primeiru-Ministru, Gabinete Ministériu Reforma Lejizlativa Assuntu Parlamentár (MRLAP), Serbisu Rejistu Verifikasaun Emprezariál (SERVE), Autoridade Inspesaun Fiskalizasaun Atividade Sanitária  Alimentár (AIFAESA), Ministériu Saúde no ministériu seluk-tan.

Roberto informa, TIC apresia tanba agora dadaun liña ministeriál sira hahú hatudu inisiativa di’ak hodi koopera atu bele instala aplikasaun governu eletrónika  iha data center governu nian hodi lori progresu serbisu la’o di’ak liu-tan tuir polítika VIII Governu Konstitusionál.

Ba futuru, nia tenik, TIC sei halo mós instalasaun aplikasaun governu eletrónika la’o to’o munisípiu hotu-hotu tuir Planu Estratéjiku Dezenvolvimentu Nasionál (PEDN) 2011-2030.

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here