Amostra sira iha Laboratóriu Kuarentena nian. Imajen/Jogerjo Guterres.

DILI, 27 maiu 2019 (TATOLI)-Tékniku Laboratóriu Kuarentena, Ministériu Agrikultura no Peska (MAP), halo hela teste ba amostra produtu importadu sira atu bele hatene nia rezultadu katak produtu sira ne’e kontein pesti ka moras ruma.

Servisu Laboratóriu Kuarentena mak atu fasilita prosesu importasaun no esportasaun no apoiu sanitáriu no fitossanitáriu bainhira atu haruka sasán bá li’ur ka hatama sasán mai ne’ebé foti amostra hosi produtu iha porta entrada Timor-Leste nian hodi halo prosesu analiza, verifika no deteta estatutu husi amostra ne’e rasik.

“Ami halo hela hanesan rai, ai-funan, liis, fehuk-europa sira mai ho rai, balun ami izola hela iha ne’e, amostra ne’e rezultadu iha hela, mas sei iha prosesu nia laran,” tékniku Laboratóriu Kuarentena, Guilhermino Soares, informa, ohin, iha edifísiu MAP, Comoro, Dili.

Sobre análize ba produtu sira ne’e bele halo bainhira  Laboratóriu Kuarentena iha kapasidade atu halo teste, maibé se labele maka liuhosi kooperasaun bilaterál haruka ba Austrália hodi finaliza teste refere hafoin haruka nia rezultadu finál mai Timor-Leste.

“Ami iha dadus kompletu kona-ba moras importasaun sira mai ou ita bolu biosecurity border inspection no inklui dadus sira ba sensibilizasaun amostra sira iha país laran rasik mós iha no seidauk bele publika tanba sei iha limitasaun barak, maibé ne’e kompeténsia ami-nia superiór”.

Daudaun ne’e Kuarentena hetan apoiu hosi Governu Austrália liuhosi departamentu agrikultura no peskiza hodi halo kolesaun ba amostra intersepsaun depois halo análize no balun ne’ebé la sufisiente halo análize iha laboratóriu tenke lori bá Austrália hafoin haruka nia rezultadu.

“Amostra sira ne’e nia prosesu la’o hela iha laboratóriu no ami-nia laboratóriu rasik seidauk iha kondisaun di’ak para hala’o serbisu análize laboratoriál”.

Tékniku Laboratóriu Kuarentena, Guilhermino Soares (loos) no Xefe Departamentu Kuarenta Animais, Izaldes Santana, hatudu hela amosta sira ne’ebé iha laboratóriu. Foto/ Jogerjo Guterres.

Guilhermino afirma atu bele publika dadus sira ne’e kompeténsia superiór sira-nia, mas Laboratóriu asegura hela dadus no loloos presiza relata rezultadu laboratóriu atu nune’e bele halo mediasaun ho empreza esporta no importa sasán sira tanba tuir lista kuarentena nian haree ba estatutu laboratoriál ba produtu sira ne’e kuarentena ka lae atu nune’e bele asegura seguransa alimentár.

Aléinde halo teste ba produtu importadu, halo mós ba produtu lokál sira ne’ebé deskonfia iha moras balun ne’ebé eziste iha nasaun no nasaun seluk seidauk iha no nasaun seluk eziste, Timór seidauk iha.

“Aproveita liuhosi kooperasaun bilaterál kada tinan ami halo sensibilizasaun rutina, halo identifikasaun, ne’ebé ita-nia dadus ne’e kompletu. Ita prepara hela dadus hirak ne’e, bainhira ema hakarak atu importa ou sosa ita-nia produtu ruma ba sira-nia rai, sira husu nia moras ka insetu sira ne’e karik, ita preparadu”.

Nune’e mós halo teste ba foos importadu sira ne’ebé deskonfia iha peste sira doméstiku no husi produtu orijinál nasaun importadu nian, maibé nia prosesu análize seidauk finaliza tanba sei haruka ba Austrália.

“Foin mak ami halo ezame porsentu 90, atu kompleta porsentu 100 ne’e ami sei haruka ba Austrália depois finaliza iha ne’ebá mak fó fali rezultadu mai”.

Daudaun ne’e ekipa Kuarentena MAP mós foti amostra produtu sira iha merkadu hodi halo análize. Tuir observasaun ne’ebé halo, amostra seluk ne’ebé tékniku laboratóriu sira foti hodi halo análize mak husi produtu hahán nian, insetu, no mós rai ne’ebé foti husi veíkulu importadu sira.

Jornalista  : Maria Auxiliadora 

Editór        : Francisco Simões

HAKEREK NO HATÁN

Please enter your comment!
Please enter your name here