Segundu Komandante Jerál Polísia Nasionál Timor-Leste (PNTL), Komisáriu Polísia Mateus Fernandes

DILI, 27 maiu 2019 (TATOLI)Segundu Komandante Jerál Polísia Nasionál Timor-Leste (PNTL), Komisáriu Polísia Mateus Fernandes  apela ba populasaun iha Timor-Leste sai autór prinsipál hodi hametin pás iha ida-idak nia hela fatin atu kontribui ba estabilidade nasionál.

Mateus dehan, dala barak ema ko’alia kona-ba hametin seguransa tenki kompriende didi’ak katak pás (dame) ne’e sei bele mosu, bainhira ema ida-idak hatene kontrola nia aan atu evita la halo problema no krime.

“Prevensaun ba seguransa ita-nia polísia hala’o nafatin durante oras 24 nia laran. Maibé, ha’u hakarak dehan nune’e. Ita hotu-hotu tenki sente bolu (chamado-termu portugés) katak ita mak tenki sai na’in ba rai ida ne’e atu asegura pás tuir ita nia hakarak,” dehan Mateus ba jornalista sira iha otél JL Vila, Fatuhada, Dili, ohin.

Mateus husu atu públiku labele pániku ba kazu krime sira ne’ebé akontese iha Dili no Baucau tanba la afeta ba estabilidade nasionál.

Nia hatutan, PNTL no FALINTIL-Forsa Defeza Timor-Leste (F-FDTL) kontinua koopera atu garante pás no koopera mós ho autoridade no povu nu’udar na’in ba pás.

“PNTL no F-FDTL ne’e instrumentu ida atua problema, maibé iha oin ne’e povu sai autór prinsipál atu garante pás,” nia subliña.

Mateus tenik, di’ak liu joven sira buka hametin pás iha ida-idak nia fatin hodi buka serbisu hadi’a moris no hadi’a família nia moris.

Tuir nia, komandu PNTL hasai deklarasaun asegura Dili to’o munisípiu iha oras 24 ne’e signifika katak autór ba pás ne’e mai hosi sidadaun hotu–hotu. “Seguransa  nia na’in mak povu  no nasaun ida ne’e nia na’in mak ita hotu,” nia esklarese.

Mateus informa, iha Dili rasik sira iha membru polísia hamutuk 400 liu hodi hala’o serbisu koopera ho autoridade lokál atu garante pás durante oras 24 nia laran.

 Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here