Primeiru-Ministru, Taur Matan Ruak, ho Prezidente Autoridade RAEOA, Mari Alkatiri. Imajen/ António Goncalves

DILI, 27 maiu 2019 (TATOLI) – Prezidente Autoridade Rejiaun Administrativu Espesiál Oe-Cusse Ambeno (RAEOA), Mari Alkatiri, nia mandatu sei termina iha 3 jullu 2019 no atu extende tan mandatu ne’e,  Primeiru-Ministru (PM), Taur Matan Ruak, mak iha kompeténsia tuir lei.

 “Atu extende mandatu ida tan ba Prezidente Autoridade, ne’e kompeténsia Primeiru-Ministru nian, tanba lei fó dalan,” esplika membru Parlamentu Nasionál hosi Bankada Kongresu Nasionál Rekonstrusaun Timorense (CNRT-sigla portugés), Carmelita Caetano Moniz, ba jornalista sira, ohin, iha Uma Fukun PN.

Tuir lei númeru 3/2014 kona-ba estabelesimentu RAEOA-ZEESM kompeténsia Primeiru-Ministru nian atu nomeia Prezidente Autoridade  no Prezidente Repúblika mak fó posse ba prezidente autoridade.

Buat ne’ebé sai preokupasaun Deputada Carmelita Caetano Moniz nian durante ne’e mak  ministériu finansa ladún iha asesu ne’ebé kompletu ba ezekusaun orsamentu hosi Zona Ekonomia Espesiál Sosiál Merkadu (ZEESM) no Tribunal rasik mós hateten la hetan dokumentu sira kona-ba ezekusaun.  Tanba ne’e, parlamentu husu atu implementa sistema free balance ho portal transparénsia atu ema hotu bele asesu kona-ba ezekusaun orsamentu iha RAEOA ka timor laran tomak.

Iha biban ne’e, membru Bankada FRETILIN, Fabião de Oliveira, argumenta katak,  rezolusaun ne’ebé hasai hosi parlamentu ezije hodi hasai Prezidente Autoridade RAEOA la’ós foin, maibé membru PN hosi Bankada CNRT ko’alia dezde iha kampaña kedan maibé to’o agora seidauk hasai.

 “Husu ba Primeiru Ministru, se posivel atu hasai bele hasai ona tanba nia mandatu hotu iha jullu. Se maka hakarak hadau,  hadau ba,” afirma Deputada Fabião de Oliveira.

Biban ne’e, Deputadu Patrocínio Fernandes hosi mós Bankada CNRT hateten, autoridade RAEOA-ZEESM lakohi harii sistema free balance hodi halo transparénsia ba ezekusaun orsamentu Estadu nian.

“Autoridade RAEOA-ZEESM lakohi harii sistema free balance, tribunal kontas husu dokumentu mós sira lakohi entrega, parlamentu liuhosi Komisaun C husu dokumentu mós la fornese, hanesan Ministra Finansa Interina mai plenária dala barak ona, maibé nia lahatene informasaun klaru kona-ba prosesu jestaun finansa iha RAEOA-ZEESM,” Deputadu Patrocínio Fernandes preokupa.

Nia subliña katak opozisaun sira sempre ezije governu ho parlamentu no ema seluk atu iha transparénsia, maibé nunka hatudu nia pratika transparénsia bainhira asume kargu nu’udár autoridade RAEOA-ZEESM.

Relasaun ho asuntu hirak ne’e, liuhosi IV governu konstitusionál iha 2010, estabelese ona sistema free balance ho sistema informasaun modernu ho teknolojia iha sistema jestaun finansa publika  ho objetivu katak aleinde aselera kreximentu ekonómiku nasaun nian, mellora servisu ba dezenvolvimentu, promove transparénsia no prestasaun kontas, halo mós konetividade jestasaun osan Estadu entre ministériu finansa ba ministériu sira no ajénsia sira seluk.

Nia hateten, Deputadu FRETILIN sira sempre ezije boa governasaun no transparénsia liga ba Prezidente Parlamentu Nasionál tanba la ajenda relatóriu KIP maske relatóriu KIP presiza hetan aprovasaun hosi membru sira molok lori mai plenária. Sira sempre ezije governu da-ualu atu kumpre, maibé sira haluha katak autoridade RAEOA nunka halo ida ne’e durante tinan lima asume kargu prezidente Autoridade RAEOA.

Iha Abríl 2012 governu AMP ne’ebé lidera hosi partidu CNRT ho nia aliadu sira lansa sistema portal transparénsia iha finansa publika, sistema ne’e fornese informasaun hotu kona-ba reseita no despeza Estadu nian, fornese informasaun ba empréstimu no apoiu ajénsia internasionál sira inklui prosesu aprovizionamentu liuhosi internet atu povu tomak bele akompaña .

Sistema nivel internasionál no hetan rekoñesimentu internasionál no entidade hotu kona-ba mekanizmu transparénsia osan Estadu maske TL ukun-an  sei ki’ik liu kompara ho nasaun boot sira. Maibé, TL orgullu programa boot ba dezenvolvimentu boa governasaun, transparénsia no kontabilidade iha uzu osan Estadu nian.

Bankada CNRT husu ba autoridade ZEEMS hodi presta konta ba reseita hotu no despeza sira tanba kámara kontas deskobre iha infrasaun finanseira ne’ebé fó prejuizu makas ba osan Estadu nian.

Ba preokupasaun Deputadu Patrocínio Fernandes nian ne’e, membru Bankada FRETILIN, Deputadu Fabião de Oliveira, argumenta katak, Prezidente Autoridade RAEOA-ZEESM husu ona ba Ministériu Finansa atu monta sistema free balance maibé to’o agora seidauk.

Jornalista      : Zezito Silva

Editór             : Francisco Simões

1 KOMENTÁRIU

  1. Konaba mandatu atu ektende Presidente Autoridade ladun klaru tamba Primeiru Ministru maka halo Proposta laos maka PM nia maka atu nomeia ne’e lalos PM maka halo proposta e Nomeiasaun ne’e kompetensia PR nia maka nomeia no fo’o posse ba Presidente Autoridade basea ba Lei no 3/2014 nebe hatur iha artigu 19 no 1.

HAKEREK NO HATÁN

Please enter your comment!
Please enter your name here