Tékniku Laboratóriu Kuarentena, Guilhermino Soares. Foto/Jogerjo Guterres.

DILI, 27 maiu 2019 (TATOLI)-Servisu Kuarentena, Ministériu Agrikultura no Peska(MAP)  enfrenta hela menus rekursu, tanba ne’e, Guilhermino Soares, nu’udar Tékniku Laboratóriu Kuarentena, husu atu presiza  tau atensaun.

“Ami presiza hetan tulun hosi ami-nia boot sira para tau atensaun másima ba servisu Kuarentena nia tanba servisu Kuarentena iha ligasaun ba seguransa alimentár tanba bele afeta ba ekonomia família no nasaun,” afirma  Guilhermino, ohin, iha Laboratóriu Kuarentena, Edifísiu MAP, Comoro, Dili.

Nia esplika katak, tanba Kuarentena sei enfrenta menus rekursu, maka servisu Kuarentena nian  seidauk la’o tuir prosedimentu no regra loloos.  Nune’e, bainhira materiál laboratóriu kompletu ona, sasán sira ne’ebé to’o (importadu sira) tenke foti uluk nia amostra no halo análize uluk depois deteta nia estatutu ne’e kuarentena ou lae.

“Se nia estatutu la’ós kuarentena, ita iha opsaun tenke destrui ou haruka fila ou halo tratamentu. Kuandu nia estatutu mak la’ós pestisira kuarentena entaun ami tenke fó fali rezultadu ba ami-nia superiór para fó orientasaun ba inspetór sira halo liberasaun,” hatete Guilhermino Soares.

“Ita presiza ekipamentu atu deteta moras sira ne’e (pesti hosi produtu importadu sira), hanesan virus, baktéria ou fungus, ita presiza deteta nia DNA (ácido desoxirribonucleico). Ida ne’e gasta ekipamentu sira ne’ebé importante no folin karun, só husu ba ami-nia boot sira tenke tau atensaun másima halo investimentu ba laboratóriu tanba gasta fundu ne’ebé sufisiente para konstrui no ita bele realiza mehi sira,” hateten Guilhermino Soares.

Guilhermino subliña kona-ba servisu Kuarentena nian, daudaun ne’e superiór sira seidauk tau prioridade no mós Governu.

“Karik Kuarentena mak prioridade, entaun iha porta entrada ne’e ami iha relasaun barak, hosi Alfándega, Imigrasaun, Polísia, Transporte. Kuarentena mesak de’it labele halo buat ida sein apoia hosi instituisaun relevante sira seluk. Karik ita-nia Estadu ida ne’e tau prioridade ba Kuarentena atu garante seguransa alimentár, entaun instituisaun ne’ebé relevante iha porta entrada tenke apoiu másimu ba Kuarentena mak foin bele fó garante ba seguransa alimentár,” tenik Guilhermino hodi dehan mós Kuarentena presiza kolaborasaun no apoia ba desizaun sira ne’ebé fó kbiit ba servisu Kuarentena nian.

Diretór Nasionál Kuarentena, Venâncio Oliveira. Imajen/Jogergo Guterres.

Diretór Nasionál Kuarentena, Venâncio Oliveira, hatete, servisu Kuarentena mak servisu merkadoria hosi Timór bá nasaun seluk no nasaun seluk mai Timor liuhosi rejistu kuarentena ne’e no bazeia ba dekretu lei númeru 21/2003 ho númeru 1/2006 sobre regulamentu jerál no mós lei mundiál ba saúde animál no International Plant Protection Convention nian ne’ebé haree movimentu sasán tama no sai husi Timor-Leste.

“Regra loloos ne’e kuandu ita iha fasilidade, antes atu tama mai, ita fó rekerimentu ba sira halo tuir, depois mai ho dokumentu, sertifikadu tuir komodita ba planta nian, ba animál no produtu seluk, maibé aban-bainrua fasilidade kompletu, antes atu distribui tenke halo analiza ruma depois mak ita fó autorizasaun para ema na’in bele uza”.

Diretór Nasionál ne’e dehan, fasilidade Kuarentena iha, maibé sasán atu uza hodi análize ne’e mak menus liu no orsamentu ba MAP nia mós limitadu liu no atu sosa materiál hodi análize moras ruma mínimu ne’e dollar 2.000, entaun ne’e presiza osan para halo analiza.

“Ita mós presiza kapasitasaun rekursu umanu ba laboratóriu nian. Presiza espesialista ba virus ka baktéria, para mai ne’e analiza espesífiku ba ne’e de’it. Ita Kuarentena ne’e seidauk iha espesialista. Tanba husi 2000 to’o mai ne’e ami akompaña kolega peritu sira husi rai seluk, entaun ami iha esperiénsia hodi bele analiza, ne’e de’it”.

Nia haktuir, pelumenus hasa’e kapasidade ka kursu ba espesialista para fila mai bele halo análize kle’an liu.

Sobre ekipamentu Laboratóriu Kuarentena nian, Diretór Nasionál ne’e dehan, mikroskópiu mós iha ona. Atu análize moras ki’ik to’o boot ne’e iha ona, mas atu análize moras kle’an liu ne’e mak sei susar uitoan.

Tuir observasaun ne’ebé halo iha Laboratóriu Kuarentena nian ne’e, iha ekipamentu ka mikroskópiu ne’ebé aat hela no ekipa téknika hosi Austrália daudaun halo hela manutensaun.

Jornalista   : Maria Auxiliadora

Editór           : Francisco Simões

HAKEREK NO HATÁN

Please enter your comment!
Please enter your name here