Ró Haksolok. Imajen dok. ZEESM

DILI, 27 maiu 2019 (TATOLI)-Konstrusaun fíziku Ró Haksolok atinje ona porsentu 70 no tuir kalkulasaun kompañia Eagle Ship nian katak fulan neen (6) tan bele konklui ona. Maibé,   presiza tan orsamentu adisionál millaun $14.

Ministru Transporte no Komunikasaun, José Agostinho da Silva. Imagen/ Egas Cristovao

Liuhosi vizita delegasaun Ministru Transporte no Komunikasaun, José Agostinho da Silva nian ba Lizboa-Portugal, semana kotuk, konsege halo vizita ba haree progresu konstrusaun Ró Haksolok.

Iha enkontru entre Ministru José Agostinho da Silva ho Jestór no tékniku ne’ebé konstrui Ró Haksolok katak, progresu konstrusaun ba Ró Haksolok la’o nafatin, tanba ne’e, Ministru José Agostinho da Silva, garante katak, sedu ou tarde Ró Haksolok sei to’o mai Timor-Leste.

 “Ami halo enkontru ho jestór no tékniku ne’ebé konstrui ró ne’e. Jestór ida uluk mate ona no ninia oan mane maka substitui entaun afeta ba prosesu konstrusaun,” informa Ministru José Agostinho da Silva, ohin, ba jornalista sira iha Palásiu Governu.

Ministru José informa, Governu aloka ona millaun $13 ba kustu produsaun Ró Haksolok, maibé presiza tan orsamentu adisionál millaun $14 hodi finaliza prosesu konstrusaun ró ne’e rasik.

“Konforme informasaun ne’ebé ekipa fó ba ha’u no delegasaun, presiza tan orsamentu purvolta adisionál millaun $14,” hateten José Agostinho da Silva, hodi esklarese mós katak, Governu sei hare proposta orsamentu adisionál ne’e iha tinan 2019 hodi aselera prosesu konstrusaun, atu nune’e, Ró Haksolok bele to’o ona Timor-Leste.

Jornalista      : Agapito dos Santos

Editór             : Francisco Simões

HAKEREK NO HATÁN

Please enter your comment!
Please enter your name here