Vise-Ministru Saúde, Bonifácio Maukoli dos Reis. Imajen António Goncalves

DILI, 27 maiu 2019 (TATOLI) – Ministru Saúde (MS), Bonifácio Maukoli dos Reis, hateten médiku espesialista hosi Xina hamutuk 11 ne’ebé servisu iha Ospitál Nasionál Guido Valadares (ONG) aleinde fó tratamentu ba populasaun, fó mós formasaun ba médiku timoroan sira.

“Médiku sira ne’e mai iha Timór la’ós servisu mesak, más servisu hamutuk ho ita nia médiku sira, la’ós de’it fó tratamentu ba pasiente sira maibé fó mós formasaun ba ita nia médiku sira, nune’e bainhira médiku Xina sira ne’e nia mandatu hotu, ita nia médiku sira iha ona kapasidade fó atendimentu ba ita nia populasaun”, hateten Bonifácio ba jornalista sira iha salaun Ministériu Saúde, Kaikoli, segunda (27/5/2019).

Governu da-ualu liuhosi Ministériu Saúde, nia dehan tau nafatin iha planu anuál hodi haruka médiku timoroan sira ba tuir formasaun iha Nasaun ne’ebé Governu estabelese ona kooperasaun hanesan, Kuba, Indonézia, Filipina no Austrália.

“Objetivu haruka ita nia médiku sira ba tuir formasaun iha rai li’ur, nune’e hasa’e liu tan sira nia kapasidade iha área espesialidade, nune’e futuru ita nia médiku sira bele atende rasik ona ita nia komunidade”, afirma Maukoli.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here