Segundu Komandante Jerál PNTL, Komisáriu Polísia Mateus Fernandes, kaer liman ho Vise Prezidente Kruz Vermella Internasionál ba ASEAN, Dany Merdhy, hafoin asina akordu kooperasaun iha otél JL Vila, Fatuhada, Dili, segunda (27/05). Imajen Tatoli/Eugénio Pereira

DILI, 27 maiu 2019 (TATOLI)—Kruz Vermella Internasionál (ICRC-sigla inglés) serbisu hamutuk ho Komandu Polísia Nasionál Timor-Leste (PNTL) apoia rekursu ba PNTL liuhusi disemina regra no padraun internasionál polísiamentu nian ba ofisiál superiór polísia sira.

Kooperasaun serbisu ne’e estabelese liuhusi asina memorandu intendementu (MoU-igla inglés) hosi Vise Prezidente Kruz Vermella Internasionál ba ASEAN, Dany Merdhy no Segundu Komandante Jerál PNTL, Komisáriu Polísia Mateus Fernandes  iha salaun enkontru otél JL Vila, Fatuhada, Dili, ohin.

 Hafoin asina akordu, kontinau kedas ho formasaun ba ofisiál superiór polísia munisípiu 12 inklui Rejiaun Administrativa Espesiál Oé-Cusse Ambeno (REAO).

Komisáriu Polísia Mateus agradese ba apoia ICRC bele hakle’an koñesimentu komandante no membru sira kona-ba lei umanitária internasionál nu’udar instrumentu forte ida ne’ebé komunidade internasionál iha atu asegura seguransa no digninidade umana liuhusi asisténsia emerjénsia bainhira mosu dezastre ruma.

 “Akordu ida ne’e asina atu serbisu hamutuk fó asisténsia ba iha tempu emerjénsia no fornese treinamentu ba membru polísia sira atu hasa’e sira nia rekursu tuir padraun internasionál polísiamentu,” dehan Mateus.

Nia espera ho formasaun ne’e membru polísia sira bele fahe fila fali koñesimentu ba membru sira atu implementa iha terrenu.

Iha fatin hanesan, Reprezentante Misaun ICRC, João Martins Alves dehan akordu serbisu ba tinan ida sei fó treinamentu kona-ba protesaun, prevensaun, kooperasaun no renufikasaun família hosi situasaun emerjénsia ruma ne’ebé iha relasaun ho regra no padraun internasionál polísiamentu nian.

João haklaken, formasaun ne’e halo la’ós  de’it ba membru PNTL, maibé ba mós F-FDTL,  autoridade lokál, universitáriu, instituisaun Estadu sira inklui mídia.

“Ami disemina de’it regra no padraun internasionál ne’ebé liga liu-ba serbisu polísiamentu nian atu ita-nia polísia sira bele hala’o kna’ar ho profisionál liu-tan,” nia hateten.

Objetivu prinsipal seluk hosi formasaun ba membru PNTL sira, João esplika, atu bele hametin liu-tan sira-nia responsabilidade no hametin prinsípiu umanitária sira no hametin kooperasaun polísia no Kruz Vermella Timor-Leste (CVTL-sigla portugés) no ICRC.

Aleinde ida ne’e, ICRC fahe mós koñesimentu kle’an ba membru polísia sira ne’ebé sei hola parte iha misaun manutensaun pás iha Organizasaun Nasaun Unida (ONU) bele prepara aan no iha koñesimentu no hatene informasaun klaru kona-ba misaun pás iha mundu.

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here